Գյուղնախարարության ծախսերը ևս կրճատվել են

2017 թվականի բյուջեի նախագծով ՀՀ գյուղատնտեսության նախարարությանը կհատկացվի 6,882.9 մլն դրամ, նախորդ տարվա 8.5 միլիարդ դրամի փոխարեն, որտեղ նախատեսվում է իրականացնել 14 ծրագիր: ԱԺ–ում բյուջեի քննարկման ժամանակ այս մասին հայտարարեց ֆինանսների փոխնախարար Ատոմ Ջանջուղազյանը՝ հավելելով, որ 2016 թվականի համեմատ, այս տարի առկա է շուրջ մոտ 2.4 մլդ դրամի նվազում, ինչը հիմնականում բացատրվում է երկու հանգամանքով.

Առաջինն ըստ նրա, այն է, որ գյուղատնտեսության նախարարության նախատեսված ծրագրերի մի մասը կիրականացվի արտաքին աջակցության շնորհիվ: «Խոսքը վերաբերում է պետական պարտքին, որն առաջանում է արտաքին աղբյուրների նպատակային ծրագրերի ֆինանսավորմամբ: Մենք ունենք որոշակի սահմանափակումներ և խնդիրը կայանում է նրանում, որ բացի ծրագրերի առաջնահերթությունից ու դրանց իրականացման հրատապությունից, կա նաև մակրոտնտեսական կայունությունն ու պետական պարտքի կայունությունն ապահովելու խնդիր, հետևաբար հաջորդ տարվա բյուջեի նախագիծը կազմվել է հենց այս տրամաբանությամբ»,- ասաց փոխնախարարը:

Նա նշեց նաև, որ «Գյուղատնտեսության ոլորտին տրամադրվող վարկերի տոկոսադրույքների սուբսիդավորում» ծրագրի համար նախատեսվում է հաջորդ տարի հատկացնել 1,163.0 մլն դրամ՝ 2016 թ. հաստատված գումարի չափով, իսկ «Պետական աջակցություն գյուղատնտեսական հողօգտագործողներին մատչելի գներով պարարտանյութերի ձեռքբերման համար» ծրագրի համար նախատեսվում է հատկացնել 2,110.0 մլն դրամ՝ 2016 թ. հաստատված 2,760.0 մլն դրամի դիմաց կամ 650.0 մլն դրամով պակաս:

Ա. Ջանջուղազյանն ընդգծեց նաև, որ նվազեցումը պայմանավորված է ծրագրի նախորդ տարիների փաստացի կատարողականով, ինչպես նաև՝ 2016թ. վերջում պարարտանյութերի կանխատեսվելիք մնացորդների առկայությամբ: