Լոլիկի էպոպեան՝ պետական հանցագործություն

2017 թվականի բյուջեի քննարկման ժամանակ ՀԱԿ խմբակցության պատգամավոր Արամ Մանուկյանը բարձրաձայնեց ջերմատների համար 17 տոկոսով գազի սակագնի նվազման հարցը: Գյուղատնտեսության նախարար Իգնատի Առաքելյանից նա հետաքրքրվեց, թե տեղյա՞կ է՝ ինչի հաշվին է գազի  սակագինը նվազում, որին ի պատասխան՝ նախարարն ասաց, թե իրեն չի հետաքրքրում՝ ինչի հաշվին է նվազումը եղել:

«Ինձ հետաքրքրում է, որ գինը նվազել է, մնացածը չի հետաքրքրում»,- պատասխանեց Առաքելյանը, հավելելով, որ ինքը տեղյակ չէ, թե ինչի հաշվին է նվազում սակագինը եւ վստահ է, որ համապատասխան գերատեսչություններն ամեն ինչ հաշվարկել են: 

Մանուկյանն իր արձագանքում հետաքրքրվեց նաև լոլիկի արտահանման խնդրով: «Ուզում եմ անդրադառնամ լոլիկի էպոպեային: Մի ժամ առաջ էլ հանդիպել եմ Ջերմոցային տնտեսությունների ասոցիացիայի նախագահ Պողոս Գևորգյանին, ով ինձ ասաց, որ 2015 թվականին հազար տոննայից ավել արտահանում չի եղել ՀՀ-ից, բայց վիճակագրությամբ դրանից 40 անգամ ավելի լոլիկ է արտահանվել Ռուսաստան: Ես բաց հայտարարում եմ, որ սա պետական հանցագործություն է: Դուք տեղյա՞կ եք, թե ինչ է տեղի ունեցել: Եվ եթե այո, ապա այսպիսի պետական խայտառակությունը կանխելու համար ի՞նչ եք անելու»,- հեգնեց Արամ Մանուկյանը:

Գյուղատնտեսության նորանշանակ նախարարն էլ իր հերթին արձագանքեց, թե տեղյակ չէ դետալներից և միայն ուրախ է, որ արտահանումը շատանում է: