Պարարտանյութը գյուղացուն ճիշտ մեխանիզմով չի տրամադրվում. Լեռնիկ Ալեքսանյան

ԱԺ-ում շարունակվում է 2017 թվականի բյուջեի քննարկման աշխատանքները: Քննարկման ժամանակ ՀՀԿ խմբակցության պատգամավոր Լեռնիկ Ալեքսանյանը հայտարարեց, որ գյուղացիները ոչ թե պարարտանյութի կարիք չունեն, այլ պարարտանյութը գյուղացիներին տրամադրվում է սխալ մեխանիզմով:

«Գյուղացուց նախօրոք գումար են ուզում, հետո դրան հաջորդում է այլ գործընթաց… Գյուղացին ոչ միայն պարարտանյութի, այլև թունաքիմիկատների ու այլ պարագաների կարիք ունի»,- ասաց պատգամավորը:

ՀՀ գյուղատնտեսության նախարար Իգնատի Առաքելյանը համաձայնեց, նշելով, թե պարարտանյութերի գնման մեխանիզմը պետք է վերանայվի. «Եթե մենք նոր մեխանիզմը ներդնենք, պարարտանյութի շուկան կլինի ավելի դեմոկրատ»,- ասաց նա՝ սակայն շեշտեց նաև, որ ժամանակը շատ սուղ է, հետևաբար չեն կարող նոր մեխանիզմները քննարկել կամ առաջարկել բյուջեում փոփոխություններ կատարել:

«Անպայման պետք է այդ մեխանիզմները փոփոխվեն»,- ասաց նա:

Անդրադառնալով դիզվառելիքի բաշխմանը՝ նախարարը նշեց, որ սուբսիդավորման ուղղությունները պետք է ուղղվեն բիզնեսի ու գյուղատնտեսության ոլորտի զարգացմանը:

Լեռնիկ Ալեքսանյանն էլ արձագանքեց, որ այդ ծրագրի շրջանակներում անիմաստ միլիոններ են կորչում, արդյունքում՝ գյուղացին դժգոհ է մնում, իսկ ծրագիրը չի աշխատում:

«Ես համամիտ եմ, բայց նոր մեխանիզմը պետք է հստակ և ճիշտ գործող լինի: Մենք աշխատում ենք այդ ուղղությամբ»,- արձագանքեց Իգնատի Առաքելյանը: