«Զոռով հարց չի լուծվում». գյուղնախարար

 ՀՀ գյուղատնտեսության նախարար Իգնատի Առաքելյանը ԱԺ-ում չհամաձայնեց լրագրողների այն դիտարկման հետ, թե Հայաստանում կոոպերացիաները չեն զարգանում, բայց զուգահեռ՝ փորձ է արվում դրանք զոռով կիրառելի դարձնել. «Ոչ, ես դեմ եմ զոռով առաջ տանելուն: Ես կողմ եմ բանակցելուն: Պետք է հանրությանը բացատրենք, թե ինչումն է խնդիրը կայանում: Եթե կցանկանան միասին աշխատել, ուրեմն գյուղատնտեսությունը կզարգանա, ոչ՝ չի զարգանա՝ ինչ նախարար էլ գա: Զոռով հարց չի լուծվում: Սկզբից պետք է միանան, հետո զարգանան,- ասաց նա:

Ինչ վերաբերում է գյուղացիներին անհրաժեշտ խորհրդատվություն տրամադրելուն, որը Հայաստան ներմուծվեց դեռ նախկին վարչապետ Տիգրան Սարգսյանի օրոք, նախարարը նշեց, որ այդպիսի խորհրդատվություններին ինքը դեմ չէ: Հակադարձմանը՝ մի՞թե այդ խորհրդատվությունն է պակասում, որ գյուղատնտեսությունը չի զարգանում: Օրինակ՝ վարչապետ Տիգրան Սարգսյանը հսկայական գումարներ էր ներդնում, որ գյուղացիներին սովորեցնեն կովերի պտուկները ճիշտ լվանալ, նախարարը նշեց, որ նույն այդ խորհրդատվություններ են, որ այսօր ֆերմերային տնտեսությունների խնդիրները կարգավորվում են:

Նախարարը նաև տեղեկություններ չուներ շուկայում առկա թուրքական լոլիկից, որի մասին բարձրաձայնեց նաև ՀԱԿ խմբակցության պատգամավոր Արամ Մանուկյանը: Նա նշեց, որ իր տեղեկություններով՝ շուկայում թուրքական լոլիկի առկայությունը բացառվում է, քանի որ Հայաստանում բավարար քանակով լոլիկ է արտադրվում. «Իմ իմանալով՝ այդպես չէ, բայց քանի որ պատգամավորը վստահ էր, նորից կուսումնասիրենք: Ինձ համար կարևորն այն է, որ դաշտում լոլիկ չի մնացել, արտահանումն աճել է, նոր ջերմատներ կկառուցվեն, որովհետև դա խթանել է լոլիկի աճեցմանը: Կարևորը գյուղատնտեսության զարգացումն է, իսկ մնացած հարցերով պետք է իրավապահ մարմինները զբաղվեն»,- ասաց նա: