«Մասնավորին կարող ենք ներգրավել բիզնես սեկտորում». Արծվիկ Մինասյան

ՀՀ բնապահպանության նախարար Արծվիկ Մինասյանը կարծում է, որ Բնապահպանության նախարարությանը տրամադրվող գումարները բավարար չեն ոլորտում նախատեսվող բոլոր խնդիրները լուծելու համար։

«Հենց սա է պատճառը, որ ծրագրերը կյանքի կոչելու համար նախատեսվում է միջազգային կազմակերպություններից դոնորական աջակցություն ստանալ»,- ԱԺ-ում, լրագրողների հետ զրույցում ասաց նախարարը։

Արծվիկ Միանասյանն ընդգծեց, որ մտադիր են այդպիսի ծրագրերի թիվը հասցնել մինչև 40-ի:

Շարունակելով խոսքը՝ նախարարը կարևորեց նաև հատուկ պահպանվող տարածքների տնտեսական ներուժի ուժեղացումն ու ունեցած հարստությունների ճիշտ օգտագործումը։ «Բնության հիմնադրամի միջոցով մենք պայմանավորվածություն ձեռք բերեցինք բնության հուշարձանի տարածքն անձնագրավորելու, պահպանման գոտի առանձնացնելու և դրա կառավարման արդյունավետությունը մեծացնելու նպատակով։ Սա լրացուցիչ եկամուտ կապահովի սկզբնական շրջանում կառավարողին, հետագայում՝ նաև համայնքին»,- ասաց նա:

Նախարարը կարևորում է նաև մասնավոր սեկտորի ներգրավումը՝ բնապահպանական խնդիրները լուծելու համար, որոնք կարող են լինել միաժամանակ և՛ բիզնես, և՛ սոցիալական ծրագրեր։ «Որպես բիզնես՝ մեր նպատակն է ներգրավել իրենց այնպիսի կարևոր տարածքներում, ինչպիսին, օրինակ՝ «Զիկատար» պահպանվող տարածքն է, որտեղ կա ենթակառուցվածքների ձևավորման անհրաժեշտություն, մինչդեռ չկան այդքան մեծ պետական միջոցներ։ Այստեղ մենք որոշակի ժամանակով կառավարումը հանձնելու դիմաց՝ մասնավորին կարող ենք ներգրավել բիզնես սեկտորում։ Նա կարող է այս տարածքում հանգիստ կազմակերպել, բնականաբար, պահպանելով բնապահպանական չափանիշները, իսկ նախարարությունն արդեն կունենա հսկողական գործառույթ»,-հավելեց Արծվիկ Մինասյանը։