38514.8 մլն դրամ՝ Էներգետիկ ոլորտի՝ աճած ծախսերի համար

Էներգետիկ ենթակառուցվածքների և բնական պաշարների ոլորտների գծով՝ 2017թվականի բյուջեի նախագծով նախատեսվում է հատկացնել 38514.8 մլն դրամ: ԱԺ-ում բյուջեի քննարկման ժամանակ հայտարարեց ՀՀ ֆինանսների փոխնախարար Ատոմ Ջանջուղազյանը՝ հավելելով, որ այս տարի ծախսերի աճը պայմանավորված է մի շարք ծրագրերով:

«Ծախսերի աճը 2016 թ. համապատասխան ցուցանիշի նկատմամբ՝ կազմում է 6116.8 մլն դրամ կամ 18.9%: Հատկացված միջոցներից 20.6 մլն դրամն ուղղվելու են ընդերքի մասին տեղեկատվության տրամադրման ծառայություն ծրագրին: Միաժամանակ՝ էներգետիկայի ոլորտում նախատեսվում են շարունակել և իրականացնել արտաքին աղբյուրներից ստացվող նպատակային վարկային և դրամաշնորհային միջոցներով 13 ծրագրեր, որոնցից են՝ ՀԲ աջակցությամբ իրականացվող Էլեկտրամատակարարման հուսալիության ծրագիրը, որով նախատեսված աշխատանքների իրականացման նպատակով 2017թ. ծրագրված է 3,620.6 մլն դրամ, այդ թվում՝ վարկային միջոցներ՝ 3,186.4 մլն դրամ, համաֆինանսավորում՝ 434.2 մլն դրամ: Իսկ ՎԶՄԲ աջակցությամբ իրականացվող Էլեկտրամատակարարման հուսալիության ծրագրի լրացուցիչ ֆինանսավորման ծրագրով նախատեսված աշխատանքների իրականացման նպատակով 2017թ. ծրագրված է 5,069.7 մլն դրամ, այդ թվում՝ վարկային միջոցներ՝ 4,224.7 մլն դրամ, համաֆինանսավորում՝ 845.0 մլն դրամ»:

Փոխնախարարի խոսքով՝ ՎԶՄԲ աջակցությամբ իրականացվող Էլեկտրահաղորդման ցանցի բարելավման շրջանակներում Երևանի ՋԷԿ-ի ենթակայանի վերակառուցման ծրագրով նախատեսված աշխատանքների իրականացման նպատակով 2017 թվականին ծրագրված է 1,043.0 մլն դրամ, այդ թվում՝ վարկային միջոցներ՝ 672.8 մլն դրամ, համաֆինանսավորում՝ 370.2 մլն դրամ: Իսկ ՀԲ աջակցությամբ իրականացվող էլեկտրաէներգետիկական ոլորտի ֆինանսական առողջացման ծրագրով նախատեսված աշխատանքների իրականացման նպատակով 2017թվականին ծրագրված է 3,285.3 մլն դրամ վարկային միջոցներ:

Ի դեպ՝ կան նաև ծրագրեր, որոնք իրականցվում են ՌԴ աջակցությամբ: Դրանք իրականացվող հայկական ԱԷԿ-ի N2 էներգաբլոկի շահագործման նախագծային ժամկետի երկարացման դրամաշնորհային ծրագրով նախատեսված աշխատանքների իրականացման համար 2017 թվականին ծրագրված է 1,599.3 մլն դրամ, այդ թվում՝ դրամաշնորհային միջոցներ՝ 1,562.2 մլն դրամ, համաֆինանսավորում՝ 37.1 մլն դրամ: Իսկ ԵՄ Հարևանութան Ներդրումային գործիքի աջակցությամբ իրականացվող «Կովկասյան էլեկտրահաղորդման ցանց I» Հայաստան-Վրաստան հաղորդիչ գիծ/ենթակայանների դրամաշնորհային ծրագրով նախատեսված աշխատանքների իրականացման նպատակով հաջորդ տարի ծրագրված է 995.9 մլն դրամ, այդ թվում՝ դրամաշնորհային միջոցներ՝ 919.8 մլն դրամ, համաֆինանսավորում՝ 76.1 մլն դրամ: