Գազի նոր սակագինը կգործի հունվարի 1-ից, իսկ էլեկտրաէներգիայի սակագինը՝ փետրվարի 1-ից. Ռոբերտ Նազարյան

Հանրային ծառայությունները կարգավորող հանձնաժողովը մտադիր է վերանայել նաև էլեկտրաէներգիայի սակագինը և հակված է իջեցնել այն: ԱԺ-ում լրագրողների հետ զրույցում հայտարարեց ՀԾԿՀ նախագահ Ռոբերտ Նազարյանը:

Նա նշեց, որ վերանայման համար հիմք է հանդիսացել գազի սակագնի իջեցումը: «Մեզ համար ակնհայտ է, որ եթե ջերմային կայանների համար գազի գինը 1000 խորհանարդի համար սահմանվում է 15 դոլարով ավելի ցածր, ապա սակագների վերանայման և համապատասխան գնահատականի կարիք ունեն, գոնե, այս գործոնով»,- հավելեց ՀԾԿՀ նախագահը՝ չհստակեցնելով սակայն, թե էլեկտրաէներգիայի սակագինը քանի՞ դրամով կիջեցվի:

«Սակագնի իջեցման այլ բաղադրիչներ կան՝ պետք է հստակեցվեն էլեկտրաէներգիա արտադրող տարբեր կայանների սակագները և առկա ներդրումերը: Մեր որոշումը կկայացնենք ոչ ուշ, քան դեկտեմբերի 1-ը: Ես խնդրում եմ, որ տաք մեզ 15-20 օր, որպեսզի ընկերություններից ստանանք նաև իրենց խնդիրները, մենք նոր ենք սկսել այս գործընթացը: Գիտեք նաև, որ այս տարի վարչապետը հանձնարարել է նոր սպառողական խումբ ունենալ՝ սոցիալապես անապահով խումբը, իսկ նրանց համար սակագինն ավելի ցածր կլինի, քան մյուս սպառողների համար: Սա էլ կհաշվենք, նոր կհայտարարենք էլեկտրաէներգիայի սակագնի վերաբերյալ վերջնական որոշումը: Գազի նոր սակագինը կգործի հունվարի 1-ից, իսկ էլեկտրաէներգիայի սակագինը՝ փետրվարի 1-ից»,- եզրափակեց նա: