Ներդրողների դրածը կերել են, հետևաբար՝ մարդիկ չեն ցանկանում այլևս ներդրումներ կատարել. Արամ Մանուկյան

ԱԺ ՀԱԿ խմբակցության քարտուղար, պատգամավոր Արամ Մանուկյանը եղել և շարունակում է մնալ այն կարծիքին, որ «Նաիրիտ» գործարանի վերագործարկումը հնարավոր է:

Հիշեցնենք, որ երեկ ՀՀ էներգետիկայի և բնական պաշարների նախարարությունը հայտարարություն տարածեց, որտեղ ասվում էր, որ, հիմք ընդունելով «Նաիրիտ գործարան» ՓԲԸ բաժնետերերի ընդհանուր ժողովի որոշումը՝ ՀՀ էներգետիկ ենթակառուցվածքների և բնական պաշարների նախարարությունը հայտարարել է մրցույթ՝ մասնավոր ներդրողի ներգրավմամբ «Նաիրիտ գործարան» ՓԲԸ արտադրական ենթակառուցվածքների վերագործարակման նպատակով։

Արամ Մանուկյանը, սակայն, կարծում է, որ ներդրողներն այս անգամ էլ կհրաժարվեն, քանի որ տարիներ շարունակ իշխանություններից խաբված են եղել, ինչի մասին գիտեն նաև ներդրումներ կատարել ցանկացողները:
«Խորը տեխնիկական ֆինանսական տվյալներին մենք չենք տիրապետում, բայց միշտ ասել ենք, որ գործարանի վերագործարկումը հնարավոր է: Մի կողմից մենք ունենք հազարավոր աշխատողներ, ովքեր մտահոգվում են, և կան իշխանություններ, ովքեր պատասխանատու են այդ խնդրի համար: Ես միշտ պահանջել եմ իշխանավորներից՝ այդ մարդկանց հետ լինել անկեղծ և հիմնավոր ներկայացնել իրավիճակը բազմակողմանի, որպեսզի, վերջապես, այդ մարդիկ հասկանան, թե ինչ ճակատագիր է սպասվում գործարանին»,- ԼՈՒՐԵՐ.com-ի թղթակցի հետ զրույցում նշեց պատգամավորը:

Նրա համոզմամբ՝ գործարանի վերագործարկման համար հնարավոր բոլոր սցենարները պետք է մշակվեն ու ներկայացվեն գործարանի աշխատողներին, որպեսզի հետագայում ինչ-ինչ հարցեր ու խնդիրներ չառաջանան: Պատգամավորի խոսքով՝ մինչև այդ խաբկանքը չվերանա, ոչ ոք լիարժեք չի կարող ասել՝ գործարանին, ի վերջո, ինչ ճակատագիր է սպասվում: «Պետք է այդ մարդկանց նկատմամբ լինել ազնիվ, անգամ եթե կա բարդ, բայց ոչ վիճելի սցենար, պետք է ներկայացնել նրանց: Չի՛ կարելի նրանց քթից բռնել ու քարշ տալ տարիներ շարունակ, ինչ-որ էսթետիկ լուծումներ գտնելով և խուսափելով խնդրի լուծումից: Միակ ճիշտ ճանապարհն այդ մարդկանց հետ նստել ու իրավիճակը ճիշտ բացատրելն է, նրանց հետ միասին դուրս գալու ելքեր որոնելը, իսկ անազնիվ լինելն՝ արդեն անթույլատրելի է»,- ասաց նա:

Ա. Մանուկյանը համոզված է, որ գործարանը փրկելու ելքեր անպայման կգտնվեն, եթե, իհարկե, դրանք փնտրելու ցանկություն ունենան: «Ես ամբողջ մեխանիզմն այս պահին չեմ պատկերացնում, բայց այն, որ կարող են լինել այդպիսի մեխանիզմներ, հնարավոր է: Կարող է դրանք լինեն միջանկյալ լուծումներ, փոխակերպումներ, կրճատումներ…, բայց միշտ էլ լուծումներ կգտնվեն: Երկար տարիներ այս ծածկադմփոցի գործընթացը շարունակվում է, ու ոչ էլ խնդիրն առաջ է գնում, ինչն էլ իր հերթին բողոքի ալիք է բարձրացնում»,- հավելեց նա:

Հարցին՝ ինչն է պատճառը, որ այսօր ներդրողները հրաժարվում են՝ Ա. Մանուկյանը պատասխանեց, որ ներդրողների դրածը կերել են, հետևաբար մարդիկ չեն ցանկանում այլևս ներդրումներ կատարել: «Մարդիկ 40 հազար դոլարով աշխատավարձ էին ստանում, էն դեպքում, երբ տաս հազար հոգի սոված նստած էր: Ներդրողներն այդ մասին շատ լավ գիտեն, դրա համար էլ հրաժարվում են»,- եզրափակեց նա:

Արմինե Եփրեմյան