«Մի՛ հավատացեք, Բագրատյանի ասածների 90 տոկոսն աբսուրդ ա». ԿԲ նախագահ

Երեկ Խորհրդարանում ՀԱԿ խմբակցութան պատգամավոր Հրանտ Բագրատյանը ցույց տվեց այն աղբյուրներից մեկը, որի գործարկման դեպքում պետությունը կարող էր խուսափել քաղաքացիներից 1000 դրամներ հավաքելուց: «ԿԲ-ի բյուջեն 33 մլրդ է, 15 մլրդ-ի շինարարություն է անում: Ո՞վ է տեսել, որ ԿԲ-ն շինարարություն անի»,- հայտարարել էր պատգամավորը:

Վկայակոչելով նոր Սահմանադրությունը՝ պատգամավորն ընդգծել էր, որ ԿԲ-ը նման գործառույթ չունի, բայց անում է. «Ինչո՞ւ պետք է ԿԲ-ն 31 մեքենա ունենա, ԱԺ-ն ինչո՞ւ պետք է 53 մեքենա ունենա, պետք է 5-6 մեքենա ունենա, ինչո՞ւ պետք է հանձնաժողովի նախագահները, լրատվության վարչության պետը, իրավաբանական վարչության պետը մեքենա ունենան»,- ասել էր Բագրատյանը:

Խորհրդարանում բյուջեի քննարկմանը ներկայացած ԿԲ նախագահ Արթուր Ջավադյանը, սակայն, հակադարձեց Բագրատյանին՝ նշելով, թե Բագրատյանի խոսքերն իրականությանը չեն համապատասխանում: «Մենք շինարարության գործառույթ չունենք: Մի՛ հավատացեք: Բագրատյանի ասածների 90 տոկոսն աբսուրդ ա: Շինարարությունը ո՞նց կարող ենք մենք անել: Մի հատ թունել ենք սարքում Դլիջանում, որը կառուցում է համապատասխան ընկերությունը: Բագրատյանի ասածներին լուրջ մի վերաբերվեք»,- ասաց Ջավադյանը: