Առաջիկա տարիներին աջակցություն է ցուցաբերվելու Արեւելյան գործընկերության պետությունների շուրջ 10 հազար ՓՄՁ-ներին

Եվրոպական հարեւանության քաղաքականության եւ ընդլայնման բանակցությունների հարցով հանձնակատար Յոհանես Հանը առաջնային նպատակ է համարում աջակցել Արեւելյան գործընկերության անդամ պետություններում գործող փոքր եւ միջին ձեռնարկատիրություններին:

«Վստահ ենք, որ տնտեսության զարգացումը կարեւոր է տարածաշրջանի կայունության համար: Առաջիկա մի քանի տարիների առաջնային նպատակներից է աջակցել ավելի քանի 10 000 փոքր եւ միջին ձեռնարկատիրություններին, առաջ մղել նրանց՝ կարեւորելով ոչ միայն գործող, այլեւ սկսնակ ձեռնարկատիրությունների ֆինանսավորումը: Կարեւոր է նաեւ միջազգային ֆինանսական կառույցների միջոցով սկզբական գումարի տրամադրումը, որպեսզի այդ կապիտալի հիման վրա ավելի մեծ ֆինանսավորում տրամադրվի, ՓՄՁ-ները կարողանան մտնել ֆինանսավորման շուկա»,-Արևելյան գործընկերության (ԱլԳ) անդամ պետությունների պատվիրակությունների ղեկավարների մամուլի ասուլիսի ընթացքում ասաց Յոհաննես Հանը:

Որպես եւս մեկ առանցքային նպատակ նա առանձնացրեց պետական կառավարման եւ արդարադատության ոլորտներում բարեփոխումերի իրականացմանն ուղղված ծրագրերի իրականացումը:

«Սա էլ իր հերթին ինքնին նպատակ է, սակայն առաջին հերթին նաեւ կապված է տնտեսությունն առաջ տանելու հետ, քանի որ փոքր եւ միջին ներդրողներ ավելի շատ կներգրավվեն, երբ հավատացած լինեն, որ դատական համակարգը բարձրակարգ է եւ անկախ: Նաեւ կարեւոր են տրանսպորտի եւ էներգետիկ կապակցվածությանն առնչվող հարցերը: Նախքան ամառային արձակուրդները համապարփակ համաձայնություն է ձեռք բերվել հարեւանության երկրների տրանսպորտի նախարարների եւ եվրոպական տրանսպորտի նախարարների միջեւ, որպեսզի անդրեվրոպական ցանցն ընդլայնվի՝ ներառելով նաեւ գործընկերության երկրները: Այժմ կարեւորը ճանապարհների, երկաթուղիների կառուցումն է, սակայն դեռ ամեն ինչ թղթի վրա է. հաջորդ քայլը դրա իրագործումն է»,-նշեց նա:

Յոհաննես Հանը նաեւ անդրադարձավ Եվրամիության «Էրազմուս+» կրթաթոշակային ծրագրերին՝ ընդգծելով, որ ցանկանում են՝ ավելի մեծ թվով ուսանողներ հաճախեն եվրոպական բուհեր:

«Այնուամենայնիվ, դա պետք է լինի երկկողմանի, որպեսզի տեղի ունենա ոչ թե ուղեղների հոսք, այլ ուղեղների շրջանառություն»,-եզրափակեց Եվրոպական հարեւանության քաղաքականության եւ ընդլայնման բանակցությունների հարցով հանձնակատարը: