Ռուսաստանի տնտեսության անկումը չի կարող չազդել Հայաստանի վրա. նախարար

ՀՀ ֆինանսների նախարար Վարդան Արամյանը կարծես համամիտ չէ այն տեսակետի հետ, թե Հայաստանում աղքատության մակարդակը բարձր է, բայց նա չի էլ հերքում, որ տրանսֆերտների կրճատմամբ՝ Հայաստանում տնտեսության աճի բացասական ազդակը մեծացել է:

«Եթե Ռուսաստանի տնտեսությունն անկում է ապրում, համաշխարհային տնտեսությունը՝ ևս, դա, բնականաբար, չի կարող Հայաստանի տնտեսության վրա չազդել»,- ԱԺ-ում լրագրողների հետ զրույցում ասաց ՀՀ ֆինանսների նախարարը:

Նա մանրամասնեց, որ Հայաստանը ժամանակին ունեցել է տրանսֆերտների մուտք՝ երկու միլիարդ դոլարի չափով, իսկ այսօր այդ թիվը նվազել է՝ հասնելով մեկ միլիարդից էլ պակաս գումարի: «Այն ժամանակ այդ տրանսֆերտները հանրության մոտ տեղաբաշխվում էին, և բնականաբար, բարեկեցության մակարդակը մեծանում էր, բայց այսօր դա չի կարող հանրության վրա բացասական չանդրադառնալ»,- նկատեց նախարարը՝ հավելելով նաև, որ այդ ժամանակ պետությունը ևս սեփական եկամուտների ու ծախսերի հաշվին որոշակի չափով կարողացել է չեզոքացնել աղքատությունը: «Այս գործոնները չենք կարող հաշվի չառնել»,- ընդգծեց նա:

Դիտարկմանը, որ աղքատության աճը մասնավորապես աճել է Սերժ Սարգսյանի պաշտոնավարման օրոք, նախարարը չհամաձայնեց, նշելով, թե պետք է այդ ցուցանիշները դիտարկել հարաբերական գործոնների մակարդակում, այսինքն՝ որոնք են եղել այն գործոնները, որոնք նպաստել են տնտեսության կրճատմանը:

Պատասխանելով հարցին, թե կարելի՞ է ասել, որ տնտեսության դրական աճ է նկատվում, նախարարն ասաց. «Կարելի է ասել, որ դրական փոփոխություններ եղել են, բայց պետք է նաև համադրենք, թե որոնք են եղել այն բացասական ազդեցությունները, որի արդյունքում ինչ ենք ունեցել, և ինչ ունենք այսօր»,- ասաց նա:

Հակադարձմանը, որ հարևան պետությունների համեմատությամբ ևս Հայաստանում աղքատության մակարդակն ավելի բարձր է, նախարարն ավելացրեց.
«Հարևանության շրջանակներում դուք չեք գտնի մի հարևան, որ տրանֆերները եղել է ՀՆԱ-ի մեջ աավելի քան 18 տոկոսով: Հայաստանն այդպիսի տնտեսությամբ երկիր է եղել և միանգամից դրա կրճատմամբ՝ այսպիսի ազդեցություն ենք ունեցել»,- ասաց նա: