Մի ռոքվորի պատմություն

«Աշտարակ-կաթ» գործարանի տնօրինությունը իրենց աշխատավարձն ու մթերած կաթի դիմաց կուտակված գումարը պահանջող ճամբարակցիներին գումարի փոխարեն «ռոքվոր» տեսակի պանիր է տրամադրել՝ 1 կգ-ը՝ 2000 դրամով: Խնդիրը, սակայն, այս կերպ էլ չի լուծվել, քանի որ ճամբարակցիները կանգնել են խնդրի առաջ. չեն կարողացել իրացնել պանիրը մինչ այն պահը, երբ երիտասարդ գործարարները նախաձեռնել են պանիրը նրանցից գնելու և այն իրացնելու գործը:

ԼՈւՐԵՐ.com-ի թղթակցի հետ զրույցում նախաձեռնության համահեղինակ Հարություն Մնացականյանը նշեց, որ իրենք ճամբարակցիներից 2000 դրամով գնում են պանիրը, փաթեթավորում և իրացնում շուկայում: Ի դեպ, ռոքվոր տեսակի պանիրը վաճառվում է շուկայականից ցածր գնով, ընդամենը՝ 3000 դրամով, այն դեպքում, երբ խանութներում պանրի այս տեսակը բավականին թանկ է:

Հարցին՝ «Աշտարակ-կաթ»-ից տուժած մարդկանց գումարը վճարել են, թե ոչ, մեր զրուցակիցը պատասխանեց.

«Մենք միայն կանխիկ գումարով ենք գնում պանիրը: Երևանցիների հետ մի փոքր բարդ է, քանի որ գումարը ուշ են տալիս, իսկ մենք կանխիկ են գնում»:

Հարություն Մնացականյանը շեշտեց, որ իրենց մոտ կաթվածահար եղած վիճակ է, քանի որ պատվերներն աննախադեպ շատ են, իսկ իրենք ժամանակային առումով չեն հասցնում:

«Արդեն 2 տոննա վաճառել ենք, մոտավորապես 6 տոննա էլ պատվեր ունենք: Հիմա սուպերմարկետների հետ ենք համագործակցում, որտեղ պանիրը կվաճառվի 3000 դրամից ոչ ավել»,- ասաց Հարություն Մնացականյանը:

Սոնա Հարությունյան