Եվս երեք վարկային պայմանագիր, որոնք Հայաստանի արտաքին պարտքը կավելացնեն շուրջ մեկ միլիոնով

ԱԺ-ում մեկնարկեցին արտահերթ նիստի աշխատանքները: Հիշեցնենք, որ այն հրավիրվել է կառավարության նախաձեռնությամբ:

Օրակարգում է կառավարության հեղինակած «Պետական տուրքի մասին» Հայաստանի Հանրապետության օրենքում փոփոխություն կատարելու մասին օրենքի նախագիծը։

Նշենք, որ սույն նախագծով առաջարկվում է «Պետական տուրքի մասին» ՀՀ 1997 թվա­կանի դեկտեմբերի 27-ի ՀՕ-186 օրենքի 19-րդ հոդված 14-րդ կետի 14.1-ին և 14.4-րդ ենթա­կե­տե­րում «բազային տուրքի 100 000-ապատիկի չափով» բառերը փոխարինել «բազային տուրքի 500 000-ապատիկի չափով» բառերով: Այսինքն՝ օրենքի ընդունման դեպքում վիճակախաղերի և ինտերնետային շահումով խաղերի կազմակերպման համար տարեկան տուրքը 5 անգամ կբարձրանա՝ 100 մլն դրամից դառնալով 500 մլն դրամ: Օրենքն ուժի մեջ է մտնում 2017 թվականի հունվարի 1-ից:

Այսօրվա նիստի օրակարգում նաև նախատեսվում է վավերացնել երեք միջազգային պայմանագիր

Նիստի մեկնարկին ՕԵԿ խմբակցության քարտուղար Մհեր Շահգելդյանը վարման կարգով ելույթ ունեցավ: Իր խոսքում պատգամավորը նկատեց, որ կառավարությունն այս արտահերթին ներկայացրել է երեք վարկային պայմանագրեր, որոնք, ըստ էության, արտաքին պարտքը ավելացնում են շուրջ մեկ միլիոնով: «Մենք խոսել ենք, որ բյուջետային վարկերը նպաստելու են արտագաղթին ու տնտեսության փլուզմանը, իսկ մեր պետությունը շատ ավելի վատ վիճակում է հայտնվելու»,- ասաց նա:

ԱԺ նախագահն առանց արձագանքելու անցավ նիստի օրակարգին…