ԵՏՄ անդամակցության արդյունքները դուք միանգամից չեք զգա. ռուս պաշտոնյա

ԱԺ-ում այսօր տեղի ունեցավ ՀՀ ԱԺ արտաքին հարաբերությունների մշտական հանձնաժողովի և ՌԴ Դաշնային ժողովի Պետական դումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի չորրորդ համատեղ նիստը: ՌԴ Պետական դումայի ԱՊՀ գործերով եվրասիական ինտեգրման և հայրենակիցների հետ կապերի կոմիտեի նախագահ Լեոնիդ Կալաշնիկովը նիստից հետո լրագրողների հետ զրույցում պատասխանելով հարցին՝ ինչո՞ւ Հայաստանում ԵՏՄ անդամակցության շնորհիվ շոշափելի արդյունքներ չկան, պատասխանեց, որ ցանկացած արդյունք միանգամից տեսանելի չի դառնում.

«Միանգամից դուք արդյունքները չեք զգա: Բայց դատելով պաշտոնական տվյալներից՝ Հայաստանն առաջատարն է: Բացի այդ, մի մոռացեք, որ արժութային ճգնաժամ կա, արժեզրկվում է մեր ազգային դրամը, ինչի պատճառով մենք չենք կարողանում հաշվել այն դրական ազդակները, որոնք կան անդամակցության հետևանքով»: Պաշտոնյան նաև հույս հայտնեց, որ շուտով ԵԱՏՄ անդամ-պետությունները կունենան միասնական շուկաներ տրանսպորտի, մարդկային ռեսուրսների, մաքսային կանոնակարգման, էներգետիկայի ոլորտներում և հորդորեց շոշափելի արդյունքները տեսնելու համար մի փոքր էլ սպասել. «Ամեն ինչ միանգամից չի կառուցվում. ոչ Մոսկվան, ոչ էլ Երևանը մեկ օրում չեն կառուցվել»:

Դիտարկմանը, թե շուրջ 2 տարի է՝ Հայաստանը ԵՏՄ անդամ է, դեռ որքա՞ն պետք է սպասենք արդյունքները տեսնելու համար, Կալաշնիկովը պատասխանեց. «2 տարին, կարծում եք, շա՞տ է: Եվրամիությունը 70 տարի է, ինչ կառուցվում է, բայց հիմա կանխատեսում են, որ փլուզվում է արդեն: Իսկ դուք ասում եք՝ 2 տարի… 2 տարում անգամ երիտասարդ ընտանիքը չի կայանում, չնայած՝ որոշները հասցնում են բաժանվել»,- ասաց նա: