Ռիչարդ Միլսը ՀՀ կառավարությանը կոռուպցիայի դեմ արդյունավետ պայքարի երկու առաջարկ ներկայացրեց

Հայաստանում ԱՄՆ արտակարգ և լիազոր դեսպան Ռիչարդ Միլսը վերջին շրջանում երկրում կոռուպցիայի դեմ պայքարում դրական արդյունքներ տեսել է, սակայն գտնում է, որ այս ուղղությամբ անելիքներ դեռ շատ կան: Հայ-ամերիկյան առևտրային պալատի անդամների առջև իր ելույթում Ռիչարդ Միլսն ուրախալի ու հուսադրող որակեց այն հանգամանքը, որ ՀՀ վարչապետ Կարեն Կարապետյանը կոռուպցիայի դեմ պայքարը իր հրապարակային ելույթներում հիշատակում է որպես գերակա ուղղություն: «Ինձ գոտեպնդում է այն, որ Հայաստանում ավելի ու ավելի շատ մարդիկ շիտակ խոսում են այն մասին, թե ինչպես է կոռուպցիան անդրադառնում իրենց վրա»,- ասաց Միլսը:

Նա հավելեց, որ ոլորտներից մեկը, որտեղ առաջընթաց է տեսել է ու ցանկանում է դրա համար գովեստի խոսքեր ուղղել ՀՀ կառավարությանը, Արդյունահանող ճյուղերի թափանցիկության նախաձեռնությանը անդամակցելու հանձնառությունն է: «Վերջին մեկ տարվա ընթացքում դեսպանատունը գործակցել է կառավարության և քաղաքացիական հասարակության հետ մի շարք հակակոռուպցիոն նախաձեռնությունների շրջանակում: Օրինակ մենք աջակցել ենք տեղական լրատվամիջոցների ծրագրերին' ուղղված հետաքննող լրագրողական հմտությունների զարգացմանը, որը լրատվական ոլորտին օգնում է իրականացնել իÖ € առանցքային ժողովրդավարական գործառույթը, այն է' կառավարության ու պետական գործիչների հաշվետվողականության և քաղաքացիների իրազեկման ապահովում»,- ասաց դեսպանը:

Նա նշեց, որ կառավարությունը կոռուպցիայի դեմ պայքարում բովանդակալից առաջընթացի համար պետք է հանդես բերի քաղաքական կամք: Դեսպանը, ոգեշնչված կոռուպցիայի դեմ պայքարելու ՀՀ վարչապետի հրապարակային հանձնառությամբ, Միլսը ՀՀ կառավարության քննությանը ներկայացրեց երկու կոնկրետ առաջարկ: «Նախ առաջարկում եմ կառավարությանն ամրապնդել բարձրաստիճան պաշտոնատար անձանց էթիկայի հանձնաժողովի դերն ու պատասխանատվությունները՝ որպես անկախ կառույց: Ես ողջունում եմ այս ուղղությամբ կառավարության վերջերս ձեռնարկած քայլը: Նշանակալի փոփոխություններ են կատարվել վարչական իրավախախտումների օրենսգրքում և քրեական օրենսգրքում' հայտարարագրում կեղծ տվյալներ ներկայացնողների համար սահմանելով պատժամիջոցներ տուգանքի, ազատազրկման և մինչև 3 տարի պետական պաշտոններ զբաղեցնելու իրավունքից զրկելու տեսքով: Սակայն դեռ ավելին պետք է արվի: Լուծումներից մեկը կարող է լինել այն, որ կառավարությունը հստակեցնի, որ պետական պաշտոնյաների հնարավոր կոռուպցիոն գործունեության վերաբերյալ քննություն սկսելու համար պարտադիր չէ նրանց բռնացնել կաշառքի ստացման կամ «լավություն» անելու պահին, որ քննություն կարող է սկսվել, եթե պետական պաշտոնյայի հայտարարագրած ակտիվները գնահատելիս դրանց մեծությունը դատախազի մոտ ողջամիտ կասկածներ առաջացնի: Հայկական լրատվամիջոցները հայտարարագրերի լավ վերլուծություններ են ապահովում և կարողանում են վերհանել այն դեպքերը, երբ պաշտոնյայի հայտարարագրած ակտիվները 40, 50 կամ 100 անգամ ավելին են, քան նրանց պետական աշխատավարձերը, սակայն կառավարության կողմից դրանք հիման վրա քայլեր ձեռնարկելու միտումներ չկան»,- ասաց դեսպանը:

Նա ՀՀ կառավարությանն առաջարկում է նաև քննության առնել ամբողջովին անկախ հակակոռուպցիոն մարմնի ստեղծումը. մարմին, որը կունենա քննություն ու քրեական հետապնդում իրականացնելու իրավասություն: Դեսպանի խոսքով' այս առաջարկը հնչեցվել է ԱՄՆ արդարադատության նախարարության հակակոռուպցիոն հարցերով գլխավոր խորհրդական Փիթեր Այզենվորթի կողմից, ով դեսպանատան հրավերով անցած տարի երկու անգամ այցելեց Հայաստան՝ կառավարության ու քաղաքացիական հասարակության հետ խորհրդակցությունների համար: Ռիչարդ Միլսը գտնում է, որ այժմ նպաստավոր պահ է, որպե սզի կառավարությունը քննության առնի այս առաջարկը, քանի որ վարչապետը դիտարկում է գոյություն ունեցող հակակոռուպցիոն խորհրդի վերակազմավորման և խորհրդի ու հակակոռուպցիոն մանդատ ունեցող այլ կառույցների միջև կապերի ու իրավասությունների հստակեցման հարցը: