Գյումրու «Շիրակ» օդանավակայանով հետաքրքրված են մի շարք ավիաընկերություններ

«Պոբեդա» ավիաընկերությունից բացի, այլ ընկերություններ ևս հետաքրքրված են Գյումրու «Շիրակ» օդանավակայանով, բայց Քաղավիացիայի գլխավոր վարչությունն այս պահին դեռ պաշտոնական առաջարկություն չի ստացել: Այս մասին Գյումրիում փետրվարի 3-ին լրագրողներին տեղեկացրեց ՀՀ քաղաքացիական ավիացիայի գլխավոր վարչության պետ Սերգեյ Ավետիսյանը' հավելելով, որ Գյումրու «Շիրակ» օդանավակայանն այս պահին համարվում է միջազգային չափորոշիչներին համապատասխան և սպասարկում է միջազգային չվերթներ:

Սերգեյ Ավետիսյանը նաև տեղեկացրեց, որ «Շիրակ» օդանավակայանի գրավչությունը բարձրացնելու նպատակով սահմանվում են մի շարք արտոնություններ: Այս պահին աերոնավիգացիոն ծառայություն իրականցվում է 50 տոկոս իջեցված սակագնով: Օդանավակայանի զարգացման ծրագրի շրջանակում իրականացվող զեղչային համակարգի կիրառման արդյունքում, պատասխանատուն վստահ է, որ կխթանվի հետաքրքրությունը Գյումրու «Շիրակ» օդանավակայանի նկատմամբ:

Գյումրու օդանավակայանը գործում է 1961 թվականից, ներկայիս շենքն ու վազքուղին շահագործման է հանձնվել 1982 թվականին, 2007 թվականին իրականացվել է հիմնանորոգում, ասֆալտապատվել է թռիչքուղին: 2007 թվականից Շիրակ օդանավակայանին շնորհվել է ԻԿԱՕ-ի առաջին կարգի օդանավակայանի կարգավիճակ: