Ի՞նչ միտում ունի վերաֆինանսավորման տոկոսադրույքի իջեցումը. պարզաբանում են տնտեսագետները

Կենտրոնական բանկը իջեցրել է վերաֆինանսավորման տոկոսադրույքը: 2017թ-ի հունվարին արձանագրվել է 2.6% գնաճ՝ նախորդ տարվա նույն ամսվա 2.2%-ի դիմաց, որի պարագայում 12-ամսյա գնանկումը մեղմվել է՝ կազմելով 0.6%:

ԼՈւՐԵՐ.com-ի թղթակցի հետ զրույցում տնտեսագետ Թաթուլ Մանասերյանն ասաց, որ Կենտրոնական բանկի կողմից վերաֆինանսավորման տոկոսադրույքները իջեցնելու հիմքը տնտեսության աշխուժացման համար նպաստավոր պայմաններ են, երբ չկան գնաճային մեծ ճնշումներ: 

«Տոկոսադրույքների բարձրացումներն ու իջեցումները համահունչ են տնտեսական միտումներին, որոնք գրանցվում են տնտեսության մեջ: Ես չեմ նկատել արհեստական միտումներ՝ դրամը արժևորելու կամ արժեզրկելու: Արդեն երկու տարի է՝ տոկոսադրույքներն ունեն նվազման միտում, սա ըստ էության, մեսիջ է ֆինանսական աշխարհին, բիզնես հանրությանը: Այսինքն՝ կարող են օգտագործել ավելի էժան փողեր, որոնք կարող են լինել ոչ միայն կարճաժամկետ վարկերի համար, այլև երկարաժամկետ պրոյեկտներ ֆինանսավորելու համար»,- ասաց նա:

Թաթուլ Մանասերյանի համոզմամբ՝ այս քաղաքականությունը համահունչ է տնտեսության հետագա աշխուժացմանն ուղղված ջանքերին, որոնք հետագայում կբերեն դրական արդյունքի:

Մեզ հետ զրույցում, տնտեսագետ Վարդան Բոստանջյանն էլ նշեց՝ անցյալ տարի, մենք ունեցել են գրեթե 10%-ից ավելի վերաֆինանսավորման մակարդակ: Իսկ հիմա, այսչափ տոկոսադրույքի իջեցումը ավելի բարենպաստ պայմաններ է ստեղծում տնտեսվարող սուբյեկտների համար:

Հարցին՝ ինչո՞ւ դա ավելի շուտ չէր արվում, տնտեսագետը պատասխանեց.

«Քանի որ ՀՀ-ն ֆինանսական առումով գտնվում է ռիսկային գոտում, փաստորեն, այդ ռիսկայնությանը դեմ կանգնելու համար ԿԲ-ն սահմանում էր ավելի բարձր վերաֆինանսավորման տոկոսադրույք: Սակայն, տոկոսադրույքների իջեցումը մինչև 0.6 տոկոս կարևոր հանգամանք է մեր տնտեսվարող սուբյեկտների համար: Այս պարագայում փողի գինը էժանանում է և տնտեսվարող սուբյեկտը հնարավորություն է ունենում ավելի մեծ գործունեություն իրականացնելու,- ասաց Վարդան Բոստանջյանը՝ հավելելով, որ տոկոսադրույքի թեկուզ չնչին իջեցումը չափազանց դրական միտում է: