ՀՀԿ-ի 150 հոգանոց ցուցակում չկամ. ֆինանսների նախարարն այլ դերակատարում ունի

Կառավարության նիստի ավարտից հետո լրագրողների հետ զրույցում ՀՀ ֆինանսների նախարար Վարդան Արամյանն, անդրադառնալով ապրիլին կայանալիք խոսրհրդարանական ընտրություններին իր դերակատարման մասին, նշեց. «Ես «Հանրապետական» կուսակցության 150 հոգանոց ցուցակում չկամ և, հետևաբար, ինձ տրված է այլ դերակատարում: Ես կարծում եմ՝ լավագույն աշխատանքն այն է, որ ամիսներ առաջ ինչ խոստացել ենք մեր քաղաքացիներին, իր կատար ածենք»:

Խոսելով տնտեսական ակտիվության ցուցանիշի մասին՝ նախարարն ասաց, որ ինչպես արդեն հայտնել են, որ ապահովելու են 3.2 տոկոս, առաջին ամսվա տնտեսական ակտիվության ցուցանիշը փաստում է, որ ունեցել են 6.2 տոկոս աճ, ուստի, եթե արտաքին աշխարհից այլ ցնցումներ չլինեն, կարող են ապահովել խոստացած 3.2 տոկոսից էլ մի փոքր ավելին: 

Նախարարն իր անհամաձայնությունը հայտնեց  արտահայտված դիրքորոշման հետ, որ ՀՀ-ն դեռևս չի կարողանում դուրս գալ 2008 թվականի տնտեսական ճգնաժամից՝ հաշվի առնելով  ՀՀ ավելացող արտաքին պարտքն ու ՀՆԱ ցուցանիշը. «Ամեն ինչ պետք է նայել հարաբերության մեջ և տեսնել, թե ինչ է կատարվում ամբողջ աշխարհում: 2014-2015 թվականները մեզ համար եղել են այնպիսի ժամանակաշրջաններ, երբ ՀՀ-ն վերականգնել է իր ակտիվությունը: Երբ նայենք և համեմատենք մեր ցուցանիշները Ռուսաստանի և Վրաստանի հետ, ապա ակնհայտ է դառնում աճի դինամիկան: Սովորաբար, տնտեսական ճգնաժամերից հետո 6-11 տարի է պահանջվում վերականգնվելու համար: Մենք կարող ենք շատ փող տպել-բաժանել, բայց դա չի համարվում կայուն տնտեսական աճ, քանի որ հաջորդ տարի կանգնելու ենք ավելի լուրջ խնդրի առաջ»: