Արցախում այս տարվա փետրվարին պարենային ապրանքների գները նվազել են

2017թ.փետրվար ամսում Արցախի Հանրապետությունում գրանցվել է 172 ծնունդ և 110 մահ, բնակչության բնական աճը կազմել է 62 մարդ: Այս մասին ԼՈւՐԵՐ.com-ը տեղեկացավ Արցախի Ազգային վիճակագրական ծառայությունից: 

Ըստ հրապարակված տվյալների՝ 2017թ.փետրվար ամսում հանրապետությունում գրանցված ամուսնությունների թիվը կազմել է 51, ամուսնալուծությունների թիվը՝ 17: 

Արցախի ԱՎԾ տվյալների համաձայն՝ 2017թ. փետրվարին նույն տարվա նախորդ ամսվա համեմատ սպառողական շուկայում արձանագրվել է 0.4 տոկոս գնանկում: Նշված ժամանակահատվածում պարենային ապրանքների (ներառյալ ոգելից խմիչք և ծխախոտ) գները նվազել են 0.3 տոկոսով, ծառայությունների սակագները՝ 1.0 տոկոսով, իսկ ոչ պարենային ապրանքների գները նույն ժամանակահատվածում մնացել են անփոփոխ:

Սպառողական գների ինդեքսը 2017թ. փետրվարին 2016թ. դեկտեմբերի համեմատ Ստեփանակերտում և Մարտունիում կազմել է 101.3 տոկոս, Ասկերանում՝ 101.4 տոկոս, Հադրութում՝ 101.1 տոկոս, Մարտակերտում՝ 100.3, Շուշիում՝ 100.1 տոկոս, իսկ Բերձորում՝ 100.7 տոկոս:

2017թ. փետրվարին 2016թ. փետրվարի համեմատ սպառողական գների ինդեքսը կազմել է 98.9 տոկոս, այդ թվում պարենային ապրանքներինը (ներառյալ ոգելից խմիչք և ծխախոտ)՝ 100.8 տոկոս, ոչ պարենային ապրանքներինը՝ 96.6 տոկոս, ծառայությունների սակագներինը՝ 97.3 տոկոս:

Ըստ ԼՂՀ-ում գործող առևտրային բանկերի կողմից ներկայացրած օպերատիվ տվյալների՝ 2017թ. մարտի 1-ի դրությամբ՝ տրամադրված վարկերը կազմել են 11.7761.2 մլն դրամ, որոնք 2016թ. մարտի 1-ի համեմատ աճել են 18.0 տոկոսով, նախորդ ամսվա համեմատ՝ 1.4 տոկոսով:

Վարկերի 0.7 տոկոսը կազմել են բանկերի ժամկետանց վարկերը, որոնք 2016թ. մարտի 1-ի համեմատ նվազել են 5.9 տոկոսով, իսկ նախորդ ամսվա համեմատ աճել են 25.6 տոկոսով: Արտարժույթով տրամադրված վարկերը կազմել են ընդհանուրի 66.0 տոկոսը, որոնք 2016թ. մարտի 1-ի համեմատ աճել են 9.4 տոկոսով, իսկ նախորդ ամսվա համեմատ՝ 1.6 տոկոսով:

2017թ. մարտի 1-ի դրությամբ բանկերում կազմակերպություններից և ֆիզիկական անձանցից ներգրավված ավանդները կազմել են 77.073.5 մլն դրամ, 2016թ. մարտի 1-ի համեմատ աճելով 19.6 տոկոսով, իսկ նախորդ ամսվա համեմատ՝ 2.8 տոկոսով:

Ավանդների ընդհանուր ծավալում 76.3 տոկոսը կազմել են բանկերի ժամկետային ավանդները, 16.0 տոկոսը՝ ցպահանջ ավանդները, 7.7 տոկոսը՝ նպատակային ավանդները: