Մտահոգվելու խնդիր ունեն զեղծարարները, խաբեբաները, ստվերային տնտեսության ներկայացուցիչները. տնտեսագետ

«Եվրասիա. էքսպերտ» պարբերականի տվյալներով՝ ՌԴ ֆինանսների նախարարությունը Պետական դումա է ներկայացրել մի օրինագիծ, որի ընդունման դեպքում լրջորեն կխոչընդոտվեն ԵՏՄ այլ երկրներից ապրանքների ներկրումը Ռուսաստան:

Սա տարածվելու է նաև Հայաստանից Ռուսաստան արտահանվող ապրանքների վրա: Պաշտոնապես դրանով արգելվելու է ԵՏՄ այլ երկրներից ՌԴ վերաարտահանվող այն ապրանքների շրջանառությունը, որոնք ՌԴ-ի հայտարարած պատժամիջոցների ցանկում են, կամ էլ դրանք ԵՏՄ մյուս երկրներ են ներկրվել արտոնյալ պայմաններով:

ԼՈւՐԵՐ.com-ի թղթակցի հետ զրույցում տնտեսագետ Թաթուլ Մանասերյանն անդրադառնալով օրինագծին՝ նշեց, որ խոսքը վերաբերում է այն ապրանքներին, որոնք Ռուսաստանի Դաշնություն գալիս են որևէ երկրից, սակայն դրանց ծագումը տվյալ երկրի չէ. «Այս դեպքում տեղի է ունենում վերարտահանում, այսինքն, պիտակները փոխում են և գրում՝ իբր արտադրված է ուրիշ երկրում, այնինչ՝ նույն երկրում արտադրված ապրանքը վերաարտահանվում է Ռուսաստան, և քանի որ պատժամիջոցներ չեն գործում, բնական է՝ այս օրենքով Ռուսաստանը պետք է իր շուկան պաշտպանի»:

Հարցին՝ օրինագծի ընդունումը ինչպե՞ս կանդրադառնա Հայաստանի վրա, Թաթուլ Մանասերյանը պատասխանեց.

«Այս առումով Հայաստանը լուրջ մտահոգություններ չունի: Նորմալ արտադրանքը, որը արտադրվում է Հայաստանում և դրանց ծագումնաբանությունը հեշտ ապացուցելի է, նման ապրանքները Ռուսաստանում խոչընդոտների չեն կարող հանդիպել: Մտահոգվելու խնդիր ունեն զեղծարարները, խաբեբաները, ստվերային տնտեսության ներկայացուցիչները, ովքեր խաբում են և՛ սեփական պետությանը, և՛ Ռուսաստանի Դաշնությանը»,- ասաց նա:

Տնտեսագետի խոսքով՝ Ռուսաստանի Դաշնությունը, ինչպես ցանկացած նորմալ երկիր, պետք է պաշտպանի իր շուկան. «Մեզ դուր կգա՞, երբ ադրբեջանական ապրանքները գան Վրաստան, այնտեղ փոխեն պիտակը և ասեն՝ արտադրված է Վրաստանում, իհարկե, դուր չի գա»,- ասաց նա՝ ընդգծելով, որ մենք ևս պետք է այդպիսի օրենք ունենանք:

Սոնա Հարությունյան