Հետընտրական շրջանում տնտեսությունն անկում է ապրում. տնտեսագետ

Տնտեսության վրա նախընտրական ու հետընտրական պրոցեսների ազդեցությունը գնահատելու համար պետք է հաշվի առնել այն հանգամանքը, որ տնտեսվարող սուբյեկտները փորձում են հետաձգել որոշակի որոշումների կայացում' սպասելով ընտրությունների արդյունքում իշխանությունների ձևավորվելիք վիճակին:

Այս մասին այսօր լրագրողների հետ հանդիպմանն ասաց տնտեսագետ Կառլեն Խաչատրյանը' «ԱԺ ընտրությունների նախընտրական և հետընտրական զարգացումների ազդեցությունը երկրի տնտեսական ոլորտի վրա» թեմայով հրավիրված ասուլիսին:

«Ամբողջ աշխարհում բիզնեսը փորձում է որոշակի զգուշություն ցուցաբերել նախընտրական շրջանում: Դա պայմանավորված է այն անորոշություններով, որոնք առկա են ընտրական գործընթացներում»,- ասաց նա՝ հավելելով այս տարվա առաջին երկու ամիսների ընթացքում, նախորդ տարվա համեմատ ունեինք 6.2 տոկոս տնտեսական ակտիվության ցուցանիշի աճ, արդյունաբերության ծառայությունների ոլորտում՝ 16.1, 11.1 տոկոս աճ. «Եթե փորձենք կանխատեսել՝ ինչ է լինելու մարտ ամսվա կտրվածքով, ապա այս հանգամանքը հաշվի առնելով՝ հնարավոր է այս ցուցանիշների անկում գրանցվի՝ պայմանավորված հետընտրական զարգացումներով, քանի որ բիզնեսը զգուշավոր է ու անհարկի շտապողականություն չի ցուցաբերում»,-ասաց նա:

Հարցին՝ ո՞ր ոլորտների վրա ազդեցություն ունեցան ընտրությունները, տնտեսագետը պատասխանեց.
«Տնտեսական բոլոր ոլորտներն այդ ազդեցությունը կրելու են, սակայն այստեղ պետք է նկատել, որ մի ոլորտում ազդեցությունը կարող է մեծ լինել, մյուս ոլորտում' համեմատաբար քիչ»:

Կառլեն Խաչատրյանի խոսքով' այս վիճակից դուրս գալու համար միջազգային պրակտիկայում 10 օրը բավարար է լինում մինչև բիզնեսը հետ գա ու հարմարվի նոր իրողությանը, սակայն մեր պարագայում դա գուցե տևի մինչև նոր կառավարության ձևավորումը: