Ներդրումները 3,2 միլիարդից էլ կանցնեն. Սուրեն Կարայան

Կառավարության նիստի ավարտից հետո լրագրողների հետ ճեպազրույցի ընթացքում ՀՀ էկոնոմիկայի նախարար Սուրեն Կարայանը, խոսելով վերջին շրջանում անընդհատ բարձրաձայնվող ներդրումների մասին, շեշտեց, որ այս տարի մեր երկրում կիրականացվի 850 մլն ԱՄՆ դոլարի ներդրում: «Հայաստանում իրականացվող ներդրումները հիմնականում կիրականացվեն Էներգետիկայի, հանքարդյունաբերության և թեթև արդյունաբերության ոլորտներում»: 

Ըստ նախարարի՝ բացի նշվածից, արդեն հայտարարվել է 3,2 մլրդ ներդրումների մասին, որի շրջանակներում էլ իրակականացվում են հատուկ ծրագրեր: «Ես ակնկալում եմ, որ մեր ներդրումներն ավելի շատ կլինեն, քան 3,2 միլիարդն է, նախանշված 3,2 միլիարդից էլ կանցնենք»:

Սուրեն Կարայանը խոսեց ներդրումների ակումբի և դրանում ընդգրկված ներդրողների մասին՝ հատուկ շեշտելով, որ Հայաստանի ներդրողների ակումբն իրենից ներակայացնում է մեկ ընդհանուր աղբյուր: «Հայաստանում ներդրումներ կիրականացնեն նաև մասնավոր ներդրողները, նրանց թվում կան նաև ազգությամբ հայեր և այլազգիներ:  Բոլորն էլ մեծ հետաքրքրություն են դրսևորել մեր երկրի նկատմամբ»,-ասաց նախարարը:

Լրագրողները Սուրեն Կարայանից խնդրեցին թվել նաև ներդրողների ակումբում ընդգրկված գործարարների անունները: Նախարարը չցանկացավ առանձնացնել նրանց՝ շեշտելով, որ այդ մասին արդեն հրապարակել են համապատասխան տեղեկատվություն: 

Հիշեցնենք, որ Կառավարության այսօրվա նիստի ընթացքում՝ ներդրողների ակումբի  մասին խոսեց նաև վարչապետ Կարեն Կարապետյանը: Ըստ Կառավարության ղեկավարի՝ ֆոնդի անդամները բավականին ճանաչված, հաջողակ բիզնեսմեններ են, ունեն լայն շրջանակներ, բազմաթիվ գործընկերներ՝ տարբեր երկրներում, և նրանք հանդիսանալու են կամուրջ՝ մեր և այդ երկրների բիզնես համայնքների միջև: Մաքսիմալ աջակցություն ենք ցուցաբերում ֆոնդի կայացմանը ու սերտ համագործակցում:

Աղավնի Սուքիասյան