ԵՏՄ-ի երկրները ձեռնամուխ են լինում Մաքսային օրենսգրքի մասին պայմանագրի վավերացմանը

Ապրիլի 11-ին ավարտվել է Եվրասիական տնտեսական միության Մաքսային օրենսգրքի մասին պայմանագրի ստորագրման փուլը: ԵՏՄ-ի երկրները ձեռնամուխ են լինում ներպետական ընթացակարգերին, որոնք նախորդում են փաստաթղթի վավերացմանը: Նոր Մաքսային օրենսգիրքն ուժի մեջ կմտնի այն բանից հետո, երբ Եվրասիական տնտեսական հանձնաժողովը Պայմանագրի վավերացման վերաբերյալ ծանուցումներ կստանա մասնակից բոլոր հինգ երկրներից, ասված է ԵՏՄ-ի մամուլի ծառայության հաղորդագրությանը:

Դրանում նշվում է, որ ԵՏՄ-ի Մաքսային օրենսգիրքը միության նորմատիվային-իրավական բազայի հիմնական փաստաթղթերից մեկն է: Եվրասիական տնտեսական միության մասին պայմանագրում ամրագրված է, որ մաքսային կարգավորումն իրականացվում է ԵՏՄ-ի Մաքսային օրենսգրքին համապատասխան: Այն կփոխարինի Մաքսային միության գործող Մաքսային օրենսգրքին եւ մաքսային կարգավորման հարցերի վերաբերյալ միջազգային համաձայնագրերին, որոնք կնքվել էին տնտեսական ինտեգրացման վաղ փուլերի՝ Մաքսային միության եւ Միասնական տնտեսական տարածքի պայմանագրային-իրավական բազայի ձեւավորման ժամանակ:
Ինչպես նշվում է հաղորդագրության մեջ, ԵՏՄ-ի Մաքսային օրենսգիրքը կբարձրացնի մաքսային կարգավորման միասնականացման եւ համաձայնեցվածության մակարդակը միությունում: «Այժմ շատ գործընթացներ կավտոմատացվեն,-ասել է Եվրասիական տնտեսական հանձնաժողովի կոլեգիայի նախագահ Տիգրան Սարգսյանը:- Ձեռնարկատերերի եւ մաքսավորների շփումը կհասցվի նվազագույնի: Փաստաթղթին անհամբերությամբ էին սպասում մեր բիզնեսի ներկայացուցիչները: Մաքսային օրենսգրքի ուժի մեջ մտնելուց հետո մենք ԵՏՄ-ում բիզնես-կլիմայի զգալի բարելավում ենք ակնկալում»:

Փաստաթուղթն օրենսդրորեն ամրագրում է միության մեջ արտաքին տնտեսական գործունեության մաքսային վարչարարության համակարգի փոխադրումը «թղթայինից» էլեկտրոնային տեխնոլոգիաների: Նման մոտեցումը զգալիորեն կտնտեսի բիզնեսի ռեսուրսները, կարագացնի մաքսային ընթացակարգերի հետ կապված գործընթացները, ինչպես նաեւ, փաստորեն, կչեզոքացնի «մարդկային գործոնը» որոշումների ընդունման բոլոր փուլերում՝ հայտարարագրի գրանցումից մինչեւ ապրանքների թողարկումը:
Նոր Մաքսային օրենսգրքի վրա աշխատանքը շարունակվել է երեք տարի: ԵԱՏՄ-ի Մաքսային օրենսգիրքն առաջին պայմանագիրն է դարձել միության նորմատիվային-իրավական բազայում, որը բոլոր փուլերում համատեղ մշակել են հանձնաժողովը, մասնակից բոլոր հինգ երկրների պետական մարմիններն ու բիզնես-ընկերակցությունները: