Մի բրնձի պատմություն (լուսանկարներ)

Երեկ ֆեյսբուքյան օգտատեր Արթուր Եղիազարյանն իր էջում «Ղարաբաղ» մակնշմամբ բրնձի տուփի լուսանկար հրապարակեց: Վերջինս զարմանք էր հայտնել՝ իսկապե՞ս, Արցախում բրի՞նձ են աճեցնում: Գրառմանը հետևեց Արցախի գյուղնախարարության աշխատակցի հերքումը՝ Արցախում բրինձ չեն աճեցնում:

Սակայն Արթուր Եղիազարյանը ԼՈւՐԵՐ.com-ի թղթակցի հետ զրույցում ասաց, որ նկարի հրապարակումն առանց հետևանքների չի մնացել: Իրեն է զանգահարել Քարոլինա անվամբ մի կին և տեղեկացրել, որ ինքն անձամբ է Արցախում բրինձ աճեցնում.

«Ձայնից ենթադրում եմ՝ սփյուռքահայ է: Շատ ուրախացա, երբ պարզվեց, որ կա մարդ, ով բրինձ է աճեցնում մեր հողի վրա: Ինչպես նշեց՝ քիչ քանակությամբ են արտադրել և սիմվոլիկ փաթեթավորել, Քարֆուրն էլ ընդառաջել է, քանի որ փոքրիկ խմբաքանակ է եղել ու վաճառք են իրականացրել»:

Մեր զրուցակցի տեղեկացմամբ՝ այսօր Սննդի անվտանգության տեսչությունից գնացել են Քարֆուր՝ ստուգումների, տիկին Քարոլինային ևս կանչել են այնտեղ. «Նա նեղսրտած էր, որ ընկել է քաշքշուկի մեջ: Սերտիֆիկատ են ուզում, սակայն, երբ նոր է սկսած եղել արտադրանքը, համապատասխան պետական մարմնից ասել են՝ «քանի որ ներքին սպառման համար եք աճեցնում բրինձը, այսինքն՝ արտահանման խնդիր չկա, սերտիֆիկատ հարկավոր չէ»: Տիկին Քարոլինան գնացել է՝ պարզելու այս հարցերը: Բնական է՝ եթե սովորական տոպրակով փաթեթավորեր, ո՞վ էր առնելու...»,- ասաց նա՝ ընդգծելով, որ մարդը լավ գործ է ուզում անել, իսկ մենք պետք է փորձենք ամեն բան անել՝ մեր հայրենակցուհուն օգնելու համար:

«Մարդը չարչարվել է, ապրանք է ստեղծել իր ձեռքերով, որի համար չպետք է տուգանվի կամ պատժվի: Աջակցելուց բացի, այլ բան չպետք է լինի: Կարծում եմ՝ ճիշտ են նրա պատմածները. նա ուներ բոլոր փաստերը, այստեղ ստելու բան չկար: Նա ասաց՝ երբ հանդիպենք, ինքը փաստեր ցույց կտա՝ որտեղ է աճեցնում և ինչ քանակով»,- եզրափակեց Եղիազարյանը: 

Արցախյան բրնձի հետքերով պարզաբանում է ներկայացրել նաև ՍԱՊԾ խոսնակ Նվարդ Առաքելյանը: Վերջինս հայտնել է.

«ՀՀ ԳՆ սննդամթերքի անվտանգության պետական ծառայությունը, արձագանքելով Արցախի Հանրապետությունում աճեցված և «Քարֆուր» սուպերմարկետում վաճառվող բրնձի մասին սոցիալական կայքում տեղ գտած տեղեկությանը, դիտարկում է իրականացրել «Քարֆուր»-ում: Արդյունքում պարզվել է, որ Արցախում (Խերխան գյուղում) Real Yummy Bagels ընկերությունը, ըստ տնօրենի՝ Քարոլին Բաղումյանի հայտարարության, փորձնական աճեցրել է բրինձ՝ 28,5 կգ, փաթեթավորել և հանձնել այն վաճառքի՝ «Քարֆուր» և Սարյան փ. վրա գտնվող «Նոր Զովք» խանութներ: Փաթեթավորված բրնձի մակնշումը թերի է եղել՝ բացակայել է համապատասխանության նշանը, և ՍԱՊԾ-ն ժամանակավորպես կասեցրել է խմբաքանակի իրացումը՝ մինչև անհամապատասխանության վերացումը, միաժամանակ, տրամադրվել է մասնագիտական խորհդատվություն՝ այն կարճ ժամկետում շտկելու և իրացնելու նպատակով: Նշենք, որ ընկերությունը գրանցված է Սննդամթերքի անվտանգության պետական ծառայության բազայում»:

Սոնա Հարությունյան