Որքան են ծախսել նախագահականում

Ազգային ժողովում «Հայաստանի Հանրապետության 2016 թ. պետական բյուջեի կատարման մասին» տարեկան հաշվետվության ժամանակ ՀՀ նախագահի աշխատակազմի ղեկավար Արմեն Գևորգյանը նշեց, որ 2016 թվականին 2015-ի համեմատ ՀՀ նախագահի աշխատակազմի ծախսերը նվազել են մոտ 5 տոկոսով:

«Այդ կրճատումը պայմանավորված է մի շարք ծախսերի տնտեսմամբ և երկու տարին մեկ պետական մրցանակի տրամադրմամբ: 2016 թվականի արդյունքներով՝ տնտեսվել և ՀՀ պետբյուջե է վերադարձվել 439 մլն դրամ», - ասաց նա:

Ֆինանսների փոխնախարար Ատոմ Ջանջուղազյանը հայտնեց, որ 2016 թվականին նախագահի աշխատակազմին հատկացվել  է 4,7 միլիարդ դրամ, իսկ Ազգային ժողովին`  4.8 միլիոն դրամ:

Նա նաև հայտնեց, որ իրավական ոլորտի մի շարք կառույցներից Դատախազությանը նախորդ տարի հատկացվել է 4 միլիարդ դրամ:

Քննչական կոմիտեին հատկացվել է 5.8 միլիարդ դրամը, Հատուկ Քննչական ծառայությանը՝  649.6 միլիոն դրամ:

Վերահսկիչ պալատին հատկացվել է 977 միլիոն դրամ: