Առաջիկա տարիներին կներդրվի պարենային ապահովագրության համակարգը

Պարենային ապահովագրության առաջին պիլոտային ծրագիրը Հայաստանում կիրականացվի 2018 թվականին։

Այս մասին ասաց ՀՀ գյուղատնտեսության փոխնախարար Արմեն Հարությունյանը։ 
«Մոտակա 3-5 տարում ամբողջությամբ ներդրվելու է պարենային ապահովագրության համակարգը։ Հաջորդ տարի կիրականացվի առաջին պիլոտային ծրագիրը։ Մենք ի սկզբանե խնդիր էինք դրել, որպեսզի ներդնենք այնպիսի համակարգ, որը ձեռնտու կլինի գյուղատնտեսությամբ զբաղվող տնտեսություններին, ինչպես նաև շահավետ՝ ապահովագրական կազմակերպությունների համար։ Այն տարբերությունը, որը կձևավորվի, կսուբսիդավորվի կառավարության կողմից։ Այդ ծրագրի շրջանակում մենք հատկացնելու ենք 5 մլն եվրո ֆինանսավորում, նույնչափ կտրամադրվի նաև Գերմանիայի զարգացման բանկի կողմից, որպեսզի մենք 2018 թվականին իրականացնենք այդ պիլոտային ծրագիրը»,- նշեց Արմեն Հարությունյանը։ 
Ծրագրի շրջանակում ստեղծվելու է բյուրո, որի գործառույթը կլինի վնասների գնահատումը։ 
«Բյուրոն ունենալու է աշխատակիցներ Հայաստանի բոլոր մարզերում։ 5 տարվա ընթացքում մեր ֆինանսական միջոցները կուղղենք 4 հիմնական ռիսկերի ուսումնասիրմանն ու վերացմանը։ Ապահովագրությունը կգործի կարկտահարության, երաշտի, ցրտահարության և ուժեղ քամիների դեպքում»,- ընդգծեց Արմեն Հարությունյանը։