Ucom-ը փորձում է մենաշնորհ ձևավորել U տառի և կանաչի ու սպիտակի համադրության նկատմամբ

Հոկտեմբերի 30-ին ՏՄՊՊՀ-ն դռնբաց նիստում քննարկելու է Ucom և Utaxi ընկերությունների ապրանքային նշանների, այսպես ասած, նմանության հարցը: Բանն այն է, որ «Յուքոմ» ընկերությունը պահանջում է «Յուտաքսի»-ի գործողությունները որակել որպես անբարեխիղճ մրցակցություն և պարտադրել վերջինիս՝ դադարեցնել «Utaxi» ապրանքային նշանի օգտագործումը՝ կանաչ և սպիտակ գույների ցանկացած համադրությամբ»: Պարզ ասած՝ արգելել օգտագործել Utaxi լոգոն:

ԼՈւՐԵՐ.com-ի թղթակիցն այս գործի վերաբերյալ մեկնաբանություն խնդրեց U taxi ՍՊԸ ֆինանսական տնօրեն Արևշատ Ղիասյանից, ով որոշ մանրամասներ ներկայացրեց.

-Ucom ընկերությունը դեռևս մի քանի ամիս առաջ մեզ նամակով էր դիմել` պահանջելով դադարեցնել U տառի և կանաչ ու սպիտակ գույների օգտագործումը մեր ապրանքային նշանի մեջ` պատճառաբանելով, որ գույնի միջոցով մենք փորձում ենք իրենց բարի համբավն օգտագործել ի շահ մեր ընկերության զարգացման: Մենք պատասխան նամակով դիմեցինք Ucom-ի տնօրենին` հիմնավորելով մեր գործունեության օրինականությունը, նաև հերքել էինք մեր կողմից ինչ-որ ձևով Ucom-ի բարի համբավն օգտագործելու փաստը: Այնուհետև, մի քանի օր առաջ, մենք էլեկտրոնային նամակ ստացանք արդեն ՏՄՊՊՀ-ից, որտեղ նշվում էր, թե Ucom-ը դիմել է Utaxi ՍՊԸ գործունեությունը որպես անբարեխիղճ մրցակցություն որակելու և մեր ապրանքային նշանի` այսինքն U տառի և կանաչի ու սպիտակի ցանկացած համադրությամբ գործածումը դադարեցնելու պահանջով: Մենք մեր պատասխանը ևս մշակել և ուղարկել ենք ՏՄՊՊՀ և պատրաստվում ենք այդ տեսակետը պաշտպանել հոկտեմբերի 30-ին՝ ՏՄՊՊՀ-ի դռնբաց նիստում:

-Կներկայացնե՞ք որոշ մանրամասներ, թե ինչ հիմքով եք դուք Ucom-ի պահանջն անօրինական համարում:

-Մեր լոգոյի գրանցման հայտը ներկայացրել ենք 2016 թվականի մայիսի 27-ին, հայտում ներկայացված է U տառի և TAXI բառի համադրությամբ գրաֆիկական լուծում, իսկ Ucom-ը մեզանից ավելի ուշ` 10.06.2016-ին ներկայացրել է մտավոր սեփականության գործակալություն իր վերջին, այսինքն` այսօր օգտագործվող լոգոյի գրանցումը հաստատելու հայտը: Մեզանից 14 օր հետո գրանցված Ucom-ի լոգոն ընդունվել է բոլոր ոլորտներում, բացի ուղևորափոխադրման ոլորտից։ Կարող եմ ենթադրել, որ այն մերժվել է հենց գործակալության կողմից, քանի որ մենք արդեն գրանցել էինք Utaxi-ն: Բայց սա դեռ ամենը չէ․ 2017 թվականի օգոստոսի 22-ին Ucom-ի կողմից հայտ է ներկայացվել հենց Utaxi ապրանքային նշան գրանցելու համար, որի համար գործակալությանն ենք ներկայացրել մեր առարկությունները, քանի որ սա արդեն որակում ենք Ucom-ի կողմից ուղևորափոխադրումների ոլորտում կրկնվող լոգոյով գործունեություն սկսելու փորձ, այսինքն` կարող ենք ասել անբարեխիղճ մրցակցության փորձ Ucom-ի կողմից Utaxi-ի հանդեպ՝ հենց ուղևորափոխադրումների ոլորտում:

-Ինչպե՞ս կմեկնաբանեք Ucom-ի խանդոտ վերաբերմունքը U տառի և կանաչի ու սպիտակի համադրությամբ ապրանքային այլ նշանների նկատմամբ:

-Տպավորություն է ստեղծվում, որ U տառի և կանաչի օգտագործման մենաշնորհի ձգտում կա: Ucom-ի կողմից ուղարկված գրության մեջ նշվել է` այլ պրոդուկտների մեջ U տառի օգտագործումը և այդ գույների համադրությունը մոլորություն է առաջացնում․ տպավորություն է ստեղծվում, որ Ucom-ը փորձում է առաջ տանել U և դրան հաջորդող ցանկացած անվանում ունեցող պրոդուկտը Ucom-ին վերագրելու մենաշնորհը:

-Ի՞նչ ակնկալիքներ ունեք ՏՄՊՊՀ-ի վաղվա նիստից:

-Չեմ կարող որակում տալ կամ կանխատեսում անել ՏՄՊՊՀ-ի որոշման կապակցությամբ, բայց հույս կարող եմ հայտնել, որ ՏՄՊՊՀ-ն կգործի օրենքի շրջանակներում, իսկ եթե օրենքի շրջանակներում է գործում, պետք է հաշվի առնի այն փաստերը, որոնք մենք ներկայացրել ենք:

Թեմայի առնչությամբ ակտիվ հղումներ` այստեղ, այստեղ, այստեղ և այստեղ: