Ճիշտ քաղաքականությունն այն կլինի, որ մենք մարդկանց սովորեցնենք եկամուտ կուտակելու ճանապարհը. Վարդան Արամյան

Հայաստանի ֆինանսների նախարար Վարդան Արամյանը չի հերքում, որ Հայաստանում առկա են սոցիալական լուրջ խնդիրներ՝ շեշտելով, որ դրանց լուծումը  կառավարության ուշադրության կենտրոնում է: Ազգային ժողովում լրագրողների հետ զրույցում նախարարն ընդգծեց, որ սոցիալական խնդիրները լուծելու հարցում Հայաստանի իշխանությունն ու ընդդիմությունը տարբեր մոտեցումներ ունեն: «Մեր մոտեցումը կայանում է նրանում, որ դրա համար մենք պետք է նախ կարողանանք տնտեսական կայուն աճ ապահովել: Եթե չենք կարողանում դա անել, խնդիրներ ենք ունենում: Մենք չենք կարողանա հետագայում հետևողական կերպով լուծում տալ առկա սոցիալական խնդիրներին: Մենք չենք կարող հիմա մեր բնակչությանը խոստանալ, որ նվազագույն աշխատավարձը, թոշակները բարձրացրում ենք, բայց հետագայում, չունենալով տնտեսական աճ, հայտարարենք, որ մենք չենք կարողանում վճարել մարդկանց աշխատավարձերն ու թոշակները»,- ընդգծեց Արամյանը:

Նա ընդգծեց, որ խստորեն դատապարտում է մոտեցումը, որ կառավարությունը սոցիալական բնույթի խնդիրների լուծումը իրականացնի ի հաշվի պետության պարտքի: «Հունաստանը գնացել է նման քայլի, իսկ դրանից հետո ստիպված է եղել գնալ կոշտ քայլերի, մի քանի անգամ նվազեցրել է թոշակները: Դա, իհարկե, հանգեցրել է շատ վատ հետևանքների Հունաստանի համար: Մենք կարծում ենք, որ սա շատ անազնիվ քայլ կլինի մեր բնակիչների նկատմամբ»,- ասաց նախարարը:

Արամյանն ասաց, որ կառավարությունը կարող է մի որոշ ժամանակ ինքը դրամական աջակցություն ցույց տալ բնակչությանը, սակայն կառավարության հնարավորությունները սահմանափակ են, իսկ մարդկանց կարիքներն անընդհատ աճում են: «Հետևաբար, ճիշտ քաղաքականությունն այն կլինի, որ մենք մարդկանց սովորեցնենք եկամուտ կուտակելու ճանապարհը: Ես կարծում եմ, որ այն ուղղությունը, որը մենք որդեգրել ենք, ճիշտ է: Մենք չպետք է մեր բնակչությանը սովորեցնենք, որ իրենք սոցիալապես անապահով են, վատ վիճակում են: Դա նրանց վրա հոգեբանորեն էլ է ազդեցություն է ունենում: Եթե մենք կարողանանք հասնել նրան, որ այն անձինք, ովքեր ունակ են եկամուտներ ստանալ, իրականացնեն իրենց այդ հնարավորությունը, դա կլինի քայլ առաջ: Մեզ մոտ սոցիալապես անապահով են հիմնականում գյուղերի բնակիչները, դրա համար մենք 60 տոկոսով ավելացրել ենք գյուղատնտեսության ոլորտի հատկացումները»,-  ընդգծեց նախարարը: