Կառավարությունը կշարունակի գյուղացիների համար սուբսիդավորել դիզելային վառելիքի սակագինը. չափը ճշգրտվում է

Կառավարության այսօրվա նիստում փոխվարչապետ Վաչե Գաբրիելյանը գյուղատնտեսության նախարար Իգնատի Առաքելյանին հանձնարարեց նիստից հետո պատասխանել լրագորղների հարցերին` անդրադառնալով խորհրդատվությանը:

Առաքելյանը նշեց, թե միշտ աշխատելու են միջազգային կառույցների հետ` իրենց խորհրդատուների որակը և մասնագիտական գիտելիքները բարձրացնելու համար. «Արդյունավետ գյուղատնտեսությունն է այն ճանապարհը, որը թույլ կտա մեզ նվազեցնել գյուղմթերքի ինքնարժեքը և սպառողների համար ունենալ մատչելի արտադրանք: Խորհրդատվական ծառայությունը նաև պատասխանատու կլինի ազդակներ հավաքագրել մարզերից և ներկայացնել գյուղատնտեսության զարգացման հիմնադրամին, շղթայաբար կգա գյուղնախարարություն և կհասկանանք, թե ինչ խնդիրրներ ունենք գյուղատնտեսական ոլորտում, սեզոնային աշխատանքներում, որը թույլ կտա մեզ ամփոփել, խմբագրել և մշակել նոր ծրագրեր` ուղղված առկա խնդիրներին»,– նշեց նա:

Նախարարն, անդրադառնալով դիզելային վառելանյութի սուբսիդավորմանը, ընդգծեց. «Թեև նախատեսված չէր դիզելային վառելանյութի սուբսիդավորումը, բայց հաշվի առնելով այն հանագամանքը, որ մենք հանձնարարական ունենք Նախագահի կողմից, ուստի վերլուծել ենք շուկայում իրավիճակը և պատրաստում ենք ծրագիր, որով կներկայացնենք սուսիդավորման ծրագիրը և կշարունակենք դիզելային վառելանյութի սուբսիդավորումը, իսկ մեխանիզմը, չափաքանակը և թե որքան կլինի վերջնական գինը մենք ձեզ դրանց մասին կտեղեկացնենք»,- ասաց Առաքելյանը:

Դիտարկմանը՝ եթե նախկինում, օրինակ 10%-ով էին անում սուբսիդավորում, և այժմ մոտ 10%-ով ավելացել է դիզվառելիքի գինը, ապա ինչպե"ս են անելու,որ նախկինի հետ բալանսը պահպանվի, Առաքելյանը պատասխանեց.

«Եթե մենք չանեինք սուբսիդավորում, և եթե չլիներ շուկայայկան գնի թանկացումը, մենք ունեինք 380 դրամ: Սպասում ենք, որպեսզի տեսնենք, թե ինչպես կկայունանան դիզվառելիքի գինը, պետք է հասկանաանք՝ ինչքան է թանկանալու, որքան է մեր հնարավորությունը, որպեսզի գոնե պահպանենանք 380 դրամը»,- նշեց նախարարը: