ՀՀ ամենախոշոր հարկատուն «Գազպրոմ Արմենիա»-ն է

Հայաստանի 1000 խոշոր հարկատուները 2017-ին պետական բյուջե են վճարել 807.4 միլիարդ դրամ հարկ, որը 12.7 տոկոսով ավելի է 2016-ի ցուցանիշից: ՀՀ ամենախոշոր հարկատուն «Գազպրոմ Արմենիա»-ն է: Ընկերության հարկային մուտքերը 2017-ի հունվար-դեկտեմբերին կազմել են 39.72 միլիարդ դրամ, ինչը, սակայն, նախորդ տարվա համեմատ պակաս է 6.28 տոկոսով:

Երկրորդ տեղում «Գրանդ Տոբակո»-ն է, 2017-ին ընկերությունը վճարել է 34.75 միլիարդ դրամ հարկ, ինչը շուրջ 54 տոկոսով ավելի է նախորդ տարվա ցուցանիշից: Երրորդ հորիզոնականում «Հայաստանի էլեկտրական ցանցեր» ընկերությունն է՝ 22.04 միլիարդ դրամ հարկային ծավալով, ինչը 27.6 տոկոսով ավելի է նախորդ տարվա ցուցանիշից:
«Ալեքս Հոլդինգ»-ը 2017-ի հունվար-դեկտեմբերին պետբյուջե է վճարել 21.47 միլիարդ դրամ` զբաղեցնելով խոշոր հարկատուների ցանկի չորրորդ տեղը:

«Զանգեզուրի պղնձամոլիբդենային կոմբինատ»-ը հինգերորդ հորիզոնականում է, 2017-ին վճարել է 18.67 միլիարդ դրամ հարկ: Ընկերությունը 104 տոկոսով ավելացրել է հարկային վճարները` 16-րդ տեղից բարձրանալով 5-րդ հորիզոնական:

Խոշոր հարկատուների տասնյակում են նաև «Գեոպրոմայնինգ գոլդ» -ը` 13.46 միլիարդ դրամ հարկային մուտքերով` աճը 43.5 տոկոս, «ՍիՓիԷս Օիլ Քորփորեյշն»-ը՝ 12.60 միլիարդ դրամ (անկումը՝ 8.65 տոկոս), «Ֆլեշ»-ը՝ 12.46 միլիարդ դրամ (աճը՝ 14.2), «ՋեյԹի Այ Արմենիա»-ն՝ 11.99 միլիարդ դրամ (աճ՝ 28.7), «Ֆիլիպ Մորրիս Արմենիա» ընկերությունը՝ 11.64 միլիարդ դրամ (աճը՝ 25.5):

10 խոշոր հարկատուների կողմից պետբյուջե է վճարվել է 198.8 միլիարդ դրամ հարկ, ինչը 2016-ի համեմատ ավելի է 25 տոկոսով: