Պետությունը նոր կարգով սուբվենցիաներ կտրամադրի համայնքներում նոր ծրագրեր իրականացնելու համար

 Հայաստանի կառավարությունը նախատեսում է 2018 թվականին սուբվենցիաներ տրամադրել համայնքներին տնտեսական և սոցիալական ենթակառուցվածքների զարգացման համար։

Այս մասին ասաց ՀՀ տարածքային կառավարման և զարգացման նախարարի տեղակալ Վարազդատ Կարապետյանը։

Նա տեղեկացրեց, որ համայնքներում տնտեսական ենթակառուցվածքների զարգացման դեպքում ամբողջ ծրագրի արժեքի մինչև 60 տոկոսը կարող է համաֆինանսավորվել պետական բյուջեից։ Սոցիալական ենթակառուցվածքների՝ մանկապարտեզի, մշակութային տների կառուցման, վերանորոգման գործընթացի պարագայում, կարող են համաֆինանսավորվել մինչև 40 տոկոս։

«Սուբվենցիաների նոր ընթացակարգը վերաբերում է միայն 2018 թվականին։ Եթե համայնքները ծրագիր են կազմում որևէ կապիտալ ծախս անելու համար և նախատեսում են գումար այդ ամենի համար՝ կարող են դիմել Կառավարությանը։ Տնտեսական և սոցիալական ենթակառուցվածքների համար պետությունը պատրաստ է համաֆինանսավորել համապատասխանաբար 60/40 և 40/60 հարաբերակցությամբ։ Այսինքն՝ տնտեսական զարգացումն ու տնտեսական ենթակառուցվածքները մենք դնում ենք որպես առաջնայնություն՝ ոռոգման ջրագծերը, գյուղատնտեսական տեխնիկան։ Օրինակ, եթե ծրագրի գումարը կազմում է 50 մլն դրամ՝ Կառավարությունը վճարում է 60 տոկոսը, իսկ համայնքը՝ 40։ Սոցիալական ծրագրերի դեպքում հակառակն է՝ 40-ը պետական բյուջեից, իսկ  60-ը՝ համայնքից»,- նշեց Կարապետյանը և հավելեց, որ կան որոշ սահմանափակումներ։

ՀՀ ՏԿԶ նախարարի տեղակալի պնդմամբ, եթե համայնքի բյուջեն մինչև 100 մլն է կազմում, ապա համայնքը գոնե 5 մլն դրամ պետք է պատրաստ լինի ծախսել կապիտալ ծախսերի ուղղությամբ։ Այս գումարն աճում է այնքան, որքան ավելանում է համայնքի բյուջեն։ 1 մլրդ դրամից ավելի բյուջե ունեցող համայնքներն առնվազն 50 մլն ներդրում պետք է կատարեն ամեն մի ծրագիրն իրականացնելու համար։

«Այս գործընթացով Կառավարությունը փորձում է խրախուսել համայնքներին, որպեսզի համայնքները իրենց ընդհանուր բյուջեում հնարավորինս աճեցնեն կապիտալ ծախսերը ՝ ճանապարհներին, լուսավորությունը, շենքերի վերանորոգմանը, խմելու և ոռոգման ջրագծերին և այլն»,- ասաց Վարազդատ Կարապետյանը։

Նրա խոսքով՝ համայնքների բնակիչները ունեն և՛ ընթացիկ ծառայությունների պահանջ՝ նախադպրոցական կրթություն, մշակութային, սպորտային  ծառայություններ, և՛ կապիտալ ծախսերի՝ բարեկարգ, լուսավորված փողոցներ, այգիներ, մարզական հրապարակներ։ Պետությունը խրախուսում է համայնքներին, որպեսզի ենթակառուցվածքներում շատ ներդրումներ անեն, որովհետև այդ ամենը կնպաստի, որ համայնքի բնակիչն ավելի շատ եկամուտ ստանա։

Սուբվենցիաների հայտերը կընդունվեն մինչև մարտ ամսվա վերջ։ 2019 թվականի համար գործընթացը կսկսենք հունիս ամսից՝ լրացուցիչ բյուջետային գործընթացի հետ մեկտեղ։

«Այժմ ընդունվում են հայտերը 2018 թվականի համար։ Համայնքները, եթե ցանկանում են տեխնիկա ձեռք բերել, պետք է գնանշմամբ հայտեր ներկայացնեն՝ ապացուցելու համար շուկայական գնի վերաբերյալ տեղեկությունը։ Շինարարության դեպքում պետք է նախահաշվային փաստաթղթեր կազմեն, ապա լրացնեն հայտը։ Հայտերը գնահատվում են ՀՀ վարչապետի ստեղծած միջգերատեսչական հանձնաժողովում, և որոշում է կայացվում սուբվենցիայի տրամադրման վերաբերյալ։ Մեկ շաբաթից ակնկալում ենք հայտեր ունենալ, երբ համայնքները կունենան պատրաստ, լրացված հայտեր, բայց եթե լինեն շինարարական աշխատանքներ, նախագծանախահաշվային փաստաթղթերի կազմումն արդեն մոտ մեկ ամիս կարող է տևել»,- շեշտեց Կարապետյանը։

Հայտերի ընդունման չափորոշիչների մասին խոսելիս ՀՀ ՏԿԶ նախարարի տեղակալն ընդգծեց, որ դրանք մի քանիսն են՝ որքան համայնքը Երևանից հեռու, սահմանամերձ և բարձրլեռնային գոտում լինի, որքան շատ ներդրումներ կարողանա անել, աշխատեղեր ստեղծել կամ մասնավոր ներգրավել ՝ այնքան միավորները բարձր են։

Պատրաստեց Լիլիթ Դեմուրյանը