Թաքնված խնդիրներ կան. Սերգեյ Բագրատյան

«Թեև Կառավարությունը 7, 7 % տնտեսական աճ է ներկայացրել, բայց մենք արձանագրել ենք, որ կապիտալն արտահոսել է երկրից, իսկ դա նշանակում է՝ այդ տնտեսական աճն էֆեկտ չի ունեցել մեր հանրության վրա»,- այս մասին այսօր, խոսելով կառավարության ներկայացրած տնտեսական աճի ցուցանիշների մասին, ասաց «Ծառուկյան» խմբակցության պատգամավոր Սերգեյ Բագրատյանը:

Բագրատյանը նշեց՝ տնտեսական աճը ներառական չէ և չի ազդում աշխատատեղերի ստեղծման վրա. «Փորձելու ենք հասկանալ՝ կոնկրետ կառուցվածքային ինչպիսի բացատրություն ունի տնտեսական աճը, և համաձայն կառավարության ներկայացրած տնտեսական տվյալների՝ լրացուցիչ վերլուծություն կանենք, կներկայացնենք հանրությանը՝ ինչն է խնդիրը, որ այդ աճը ներառական չէ և չի ազդում մարդկանց կենսամակարդակի վրա: Ենթադրենք՝ ունենք այդ աճը. դա նշանակում է, որ թոշակները, նպաստները պետք է բարձրացնեին և ներգաղթ պետք է լիներ, քանի որ այդպիսի տնտեսական աճը նաև ներգաղթ է ապահովելու: Սակայն, եթե մարդկային և ֆինանսական կապիտալն արտահոսում է, նշանակում է՝ թաքնված խնդիրներ կան»,- ասաց նա:

Բագրատյանի կարծիքով՝ տնտեսական զարգացման մոդելները տարբեր են. «Միգուցե մենք չինական մոդելն ենք ընտրում՝ հաշվի առնելով այն հանգամանքը, որ քաղաքական լուռումուռ վիճակ է: Եթե մենք քաղաքական կուսակցությունների ակտիվացում չենք նկատում, ընդակառակը՝ գերիշխող դիրք ունի Հանրապետական կուսակցությունը և հիմնական ընդդիմախոսները քննադատում են այս իրավիճակը, իշխող կուսակցության շատ ներկայացուցիչներ, ովքեր իշխանամետ վերլուծաբաններ են, փորձում են շեղել հանրության ուշադրությունը՝ առաջարկելով, որ մենք ի վիճակի ենք նաև չինական մոդելով զարգանալ: Սակայն, ի տարբերություն մեր երկրի՝ Չինաստանում տնտեսությունը բացարձակ ազատ պայմաններում է գործում, և քաղաքական իշխանությունից կախված չէ, և ունեն հրաշալի ցուցանիշներ տնտեսական զարգացման առումով»,- նշեց Բագրատյանը: