«Չորրորդ ինքնիշխանություն». «Էն ՀԱԿ–ը թաքուն մածունը կերավ»

Թերթը գրում է. «Որոշ քաղաքական ուժեր և մասնավորապես՝ քաղաքական կուսակցությունների առանձին միավորներ խիստ ծանր են տանում այն հանգամանքը, որ սոցիալական ցանցերում կազմակերպված հարցումներում մշտապես առաջատարի դիրքերում է հայտնվում Հայ ազգային կոնգրեսը:

Ամեն անգամ այդ հարցումների ամփոփումից հետո տարօրինակ հուզումներ են առաջանում. Ֆեյսբուքյան հայկական տիրույթում աշխարհաքաղաքական քննարկումներ են ծավալվում, թե այդ ինչպես եղավ, որ ՀԱԿ-ը հայտնվեց առաջին հորիզոնականում: Քննարկումների մասնակիցները դավեր են փնտրում, սև ու մութ ուժերին են հղում անում, որոնք, ըստ նրանց, լցոնել են՝ կեղծելով վարկանիշային քվերակությունների արդյունքները: Անկեղծ ասած, այս ամենը մեզ շատ ծիծաղելի է թվում, և մարդիկ, որոնք դրա տակ ամեն ինչ տեսնում են, բացի այն պարզ իրողությունից, որ ՀԱԿ-ի համար, ի տարբերություն իրենց նախընտրած ուժերի, քվեարկել են, իրենք իրենց դնում են անհեթեթ իրավիճակի մեջ:

10 օր շարունակ «ԼՈՒՐԵՐ.com» էլեկտրոնային կայքը հարցում էր իրականացնում. «Ո՞ր կուսակցությանը կտայիք ձեր ձայնը, եթե խորհրդարանական ընտրությունները լինեին այսօր» հարց առաջադրելով իր ընթերցողներին: «ՉԻ»-ն այդ հարցմանն անդրադարձել է ճիշտ այնպես, ինչպես պարբերաբար ներկայացնում է վիրտուալ Հայաստանի օրակարգը, այսինքն՝ ֆեյսբուքյան իրականությունը: Կայքը հարցումն ամփոփելիս նշել էր. «Հարցման առաջատարը ընդդիմադիր Հայ ազգային կոնգրես դաշինքն է, որը քվեարկության փակման ժամանակ հավաքել է 27%: Երկրորդ տեղում ԲՀԿ-ն է՝ 25%-ով, ապա, ՀՅԴ-ն՝ 17%-ով ու ՀՀԿ-ն՝ 16-%-ով: 7% ձայն է հավաքել «Ժառանգությունը», նույնքան էլ այլ կուսակցություններ, իսկ ՕԵԿ-ը ամենավերջին տեղում է, այդ ուժերի օգտին քվեարկել է մեր ընթերցողների 1%-ը միայն»: Ապա ներկայացրել էր, թե ինչ զարգացում է նկատել կայքի խմբագրակազմը հարցման ընթացքում. «Առաջին օրերին աղյուսակի բացարձակ առաջատարը ՀՅԴ-ն էր, հետո ՀՅԴ-ականները, համարելով, որ կատարել են իրենց առաքելությունը և սոցիալական ցանցերում քվեարկություն են ապահովել, փոքր-ինչ հանդարտվեցին: Վերջին օրերին ՀՅԴ-ի համար քվեարկողների հոծ խմբերը անգործության մատնվեցին՝ պարտության մատնելով Դաշնակցությանը: Ի տարբերություն ՀՅԴ-ի, ԲՀԿ ընտրազանգվածը ակտիվ և համառ քվեարկեց այս քաղաքական ուժի համար: ԲՀԿ-ն երկար ժամանակ առաջին հորիզոնականում էր, միայն վերջին օրերին զիջեց առաջատարի իր դիրքերը: ՀՀԿ-ի համար քվերակեցին առաջին երկու օրերին, հետո ՀՀԿ-ի համար այլևս քվեարկողներ չեղան: ՀՀԿ-ն, ըստ էության, վիրտուալ իրականության մեջ ևս ընտրազանգվածի լուրջ խնդիր ունի: Ինչ վերաբերվում է ՀԱԿ-ին, ապա ՀԱԿ-ը առաջին հորիզոնականներում հայտնվեց վերջին օրեին: ՀԱԿ-ին քվեարկողները շարունակեցին համառորեն քվեարկել՝ չհիասթափվելով անգամ այն ժամանակ, երբ ՀԱԿ-ը հայտնվել էր գրեթե վերջին հորիզոնականներում», ամփոփման մեջ նշել էր «ԼՈՒՐԵՐ.com»-ը:

Պարզվեց, որ այս հարցման մասին քննարկում է ծավալվել ֆեյսբուքի «Քաղաքացիական հասարակություն» խմբում, որտեղ աչքի է ընկել ԱԺ Ժառանգություն խմբակցության պատգամավոր Ստեփան Սաֆարյանը: Վերջին «վերլուծություններին» և դրանց արձագանքներին երեկ անդրադարձել է այն կայքը, որը հարցման կազմակերպիչն էր: Կայքը մասնավորապես գրել է. «Վերջին օրերին սոցիալական ցանցերում ակտիվ քննարկման առարկա էր դարձել ԼՈՒՐԵՐ.com-ում անցկացված՝ «որ կուսակցությանը կտայիք ձեր ձայնը, եթե խորհրդարանական ընտրությունները լինեին այսօր» թեմայով հարցման արդյունքները: Ոմանք քննարկում էին, թե որքանով էին ինտերնետային հարցման արդյունքներն արտացոլում բնակչության իրական տրամադրությունները, ՀՅԴ-ի, ԲՀԿ-ի որոշ անդամներ մեղադրում էին իրենց կուսակիցներին՝ ոչ բավարար ակտիվության համար, ՀԱԿ-ը տոնում էր համացանցային լսարանում տարած իր հաղթանակը:

ՀԱԿ անդամ, արձակագիր Համբարձում Համբարձումյանը նույնիսկ հաճելիորեն զարմացել էր, որ իրենք կարողացան առաջ անցնել ԲՀԿ–ի «ֆեյքեր»–ից (fake profiles - կեղծ օգտատերեր)։ Սակայն, թերևս ամենաուշագրավը «Ժառանգություն» խմբակցության ղեկավար Ստյոպա Սաֆարյանի արձագանքն էր։ 

Ֆեյսբուքյան «Քաղաքացիական հասարակություն» խմբում, անդրադառնալով մեր կազմակերպած հարցմանը, Ստյոպա Սաֆարյանը գրում է. «Հենց նոր նայեցի ՀԱԿ խմբի էջը. պարզվում է՝ ահագին մեծ կամպանիա է գնացել՝ այս զավեշտալի հարցմանը մասնակցելու համար: Պարբերաբար կոչեր բոլորին, որ մասնակցեն, քվեարկեն: Եթե պետք է սրան հավատան, ուրմեն ինքնախաբեության մեջ են»:

«Ակնհայտ է, որ «հարցումը» կոորդինացված է մեկի կողմից, որ ՀԱԿ համակիր է կամ անդամ: Եթե երկրորդ տեղում ԲՀԿ-ն է, ապա նշանակում է՝ նա նույնպես փոխանցում է Լևոն Տեր-Պետրոսյանի ուղերձը ԲՀԿ-ին՝ ընդդեմ ՀՀԿ-ի։ Սա արդեն ցույց է տալիս, թե ինչ արժե այդ հարցումը: Այսինքն՝ անգամ որպես ինտերնետ հարցում, որը երբեք բնակչության տրամադրություններ չի արտահայտում գոնե մեր երկրում, այլ արտահայտում է քաղաքականապես, հասարակայնորեն ակտիվ հատվածի կարծիքը, անգամ այս պարագայում այդպիսին էլ չէ: Իրենք իրենց խաբում են, ու փորձում կտեր տալ ԲՀԿ-ին»,– գրում է Ստեփան Սաֆարյանը:

Նա պատահական չի համարում, որ հարցման արդյունքներով` «ՀԱԿ-ն և ԲՀԿ-ն միասին արդեն «մեծամասնություն» են կազմում»։

Իբրև իր մտահանգումների ճշմարտության ապացույց՝ «Ժառանգություն» խմբակցության ղեկավարը նշում է այն փաստը, որ ԼՈՒՐԵՐ.com-ը լուսաբանում է «Արմատ» ակումբի ասուլիսներն ու մամուլի տեսությունում անդրադառնում է նաև «Չորրորդ ինքնիշխանություն» թերթի հրապարակումներին. «Այլևս կասկած չկա՝ ՀԱԿ-ամերձ խաղեր կան կայքում»,– հայտարարում է Սաֆարյանը։

Ուզում ենք հիշեցնել պարոն Սաֆարյանին, որ հարցումը ԼՈՒՐԵՐ.com-ում բաց է եղել ուղիղ 10 օր, և հնարավորինս ավելի մեծ թվով մարդկանց հասանելի դարձնելու համար` ակտիվորեն տարածվել է սոցիալական ցանցերի առավել ակտիվ խմբերում, ինչպես նաև տարբեր կուսակցությունների (այդ թվում՝ «Ժառանգության») էջերում. ոչ ոք չէր խանգարում «Ժառանգության» ակտիվիստներին ևս «մեծ կամպանիա» կազմակերպել՝ հարցմանը մասնակցելու համար։

Նաև խնդրում ենք նկատել, որ ԼՈՒՐԵՐ.com-ն առանց խտրականության լուսաբանում է ոչ միայն «Արմատ» ակումբում, այլև մամուլի մյուս ակումբներում կազմակերպված ասուլիսները, իսկ մամուլի տեսությամբ լուսաբանում է ոչ միայն «Չորրորդ ինքնիշխանության», այլև ընդհանուր մամուլի բոլոր ուշագրավ հրապարակումները։

Ի դեպ, հարցման ամփոփագրի մեջ մենք մանրամասն նկարագրել էինք, թե ինչ վայրիվերումներ են եղել հարցման տաս օրերի ընթացքում, և եթե պարոն Սաֆարյանը հարցմանը հետևեր առաջին օրերին, հավանաբար, մեզ մեղադրելու էր «ՀՅԴ–ամերձ խաղեր»–ի մեջ։

Ինչևէ, ողջունում ենք պարոն Սաֆարյանի կողմից հնչեցրած ոչ այնքան օբեկտիվ, սակայն «խորքային» վերլուծությունը և մաղթում ենք «Ժառանգություն» կուսակցությանը հաջորդ խորհրդարանական ընտրություններում հավաքել նվազագույնն այնքան ձայն, որքան հավաքել էր ԼՈՒՐԵՐ.com-ում անցկացված հարցման արդյունքներով», ահա այսպես է կայքը պատասխանել Ստեփան Սաֆարյանին: «ՉԻ»-ն իր կողմից հիշեցնում է, որ «Ժառանգությունն» հավաքել էր յոթ տոկոս:

Անկեղծ ասած, ՉԻ-ն չէր անդրադառնա այս պատմությանը, եթե քննարկման ժամանակ շահարկված չլիներ մեր թերթի անունը: Ստեփան Սաֆարյանը, անկեղծ ասած, թուլություն ունի ՉԻ նկատմամբ և իր ասելիքը կարևորելու համար մշտապես օգտագործում է թերթի անունը: Սա առաջին դեպքը չէ, և ոչ էլ վերջինն է լինելու: Պարզապես Սաֆարյանը ճիշտ կաներ նման անհեթեթ իրավիճակներում հայտնվելիս թերթի անունը անիմաստ չշահարկեր, որպեսզի ինքն էլ զերծ մնար շահարկման հերոս դառնալուց: Ասում ենք՝ բացառապես մտածելով Ստեփան Սաֆարյանի բարի անվան ու համբավի մասին»: