Ինչ սպասել Աճեմօղլուից

Վարչապետի հրավերով ակնկալվում է տնտեսագետ Դարոն Աճեմօղլուի այցը , ով պետք է աջակցի Հայաստանի տնտեսությունը վերականգնելու եւ զարգացնելու հարցում:

ԼՈւՐԵՐ.com-ի թղթակիցն Աճեմօղլուի՝ Հայաստանում տնտեսության զարգացմանն ուղղված հնարավոր գործունեության մասին զրուցել է քաղաքագետ Գագիկ Համբարյանի հետ.

«Ողջունելի քայլ է աշխարհահռչակ հայ տնտեսագետին Հայաստան հրավիրելը, որպեսզի համատեղ փորձեն հասկանալ, թե ինչպես կարելի է Հայաստանը հանել այս ճգնաժամից: Չեմ կարծում, որ նա կարող է անձնական շահի համար գալ, ավելի հակված եմ մտածել, որ սա հայրենասիրական քայլ է՝ սեփական ներդրումն ունենալու հայրենիքի տնտեսական զարգացման գործում: Աճեմօղլուի ունակությունները կարելի է օգտագործել արտաքին ներդրողներին Հայաստան բերելու համար»,- կարծիք հայտնեց քաղաքագետն ու հավելեց, որ ներդրումների վերաբերյալ Փաշինյանի հայտնի կոչը բավականին լավ քայլ է՝ եթե իրականում այն գործի:

«Նախկին իշխանություններից մնացած օրենքով՝ Հայաստանում խոշոր ներկրողների համար սահմանված է ավելի ցածր հարկային շեմ, քան միջին և փոքր ներկրողների համար: Կարծում եմ՝ այդ քայլը միտումնավոր է արվել՝ պետականորեն մենաշնորհներն ապահովելու համար: Եթե Նիկոլ Փաշինյանը ցանկանում է մենաշնորհները վերացնել, ապա նա պետք է աշխատի հենց այս ուղղությամբ»,- ասաց նա:

Հարցին՝ քաղաքագետը հնարավոր համարո՞ւմ է Աճեմօղլուին Հայաստանում որևէ պաշտոն տալը, քանի որ յուրաքանչյուր հարց լուծելու համար որոշակի լծակներ են հարկավոր, Համբարյանը պատասխանեց. «Չեմ կարծում, որ այստեղ երկար կմնա և կարիք կլինի որևէ պաշտոն ստանձնել: Կարծում եմ՝ նա խորհրդատվական գործառույթներ կկատարի վարչապետին կից ձևավորված որևէ  մարմնում կամ հնարավոր է՝ հենց վարչապետի խորհրդական լինի»:

Լիլիթ Հակոբյան