Ինչու են Լարսում կուտակումները շարունակվում. մեկնաբանում է փոխնախարարը

Լարսի անցակետում կուտակումները շարունակվում են։ Այս պահին ռուսական կողմում հերթը 6-ից 7կմ է, իսկ վրացական կողմում 800 մետրից 1 կմ։ Այս մասին ԼՈւՐԵՐ․com-ի հետ զրույցում ասաց ՀՀ տրանսպորտի, կապի և տեղեկատվական տեխնոլոգիաների փոխնախարար Արմեն Փամբուխչյանը։

«Մենք ակտիվ համագործակցում ենք Վրաստանի դեսպանատան և Դոնի Ռոստովում մեր հյուպատոսարանի հետ։ Պաշտոնական դիրքորոշումները հաշվի առնելով կարող ենք ասել՝ այնտեղ կուտակումների հետ կապված չկան արհեստական երանգներ։ Հերթերը տուրիստների քանակի հետ են կապված»,- ասաց Փամբուխչյանը։

Նա նաև նշեց, որ 130 մեքենա, որոնցից 40-ը հայկական մեքենաներ են, անցնելու նախապատրաստական փուլում են գտնվում և հավելեց՝ «ռուսական կողմում կանգնած մեքենաների 50 տոկոսը ռուս քաղաքացիներ են, տուրիստներ են որոնք գնում են Վրաստան հանգստանալու»։

Կուտակումները կարգավորելու հետ կապված Փամբուխչյանն նշեց, որ աշխատանքներ են տարվում։

«Երեկ 5 կմ-անոց հերթի ժամանակ մեքենայի անցանելիությունը հերթի վերջից 5 ժամ է տևել, այսօր 6-ից 7կմ-անոց հերթում ևս 5 ժամ է»,- ասաց նա։

ԼՈւՐԵՐ․com-ը կապ հաստատեց նաև Վրաստանում ՀՀ դեսպանության մամուլի, տեղեկատվության և հասարակայնության հետ կապի բաժնի պետ Հարություն Հայրապետյանի հետ՝ պարզելու մթերք արտահանող բեռնատարերի խնդիրն ինչպես է կարգավորվում։

«Ես ձեզ վստահեցնում եմ ապրանքը, որը փչացող է՝ ծիրան կամ այլ փչացող մթերք, մի քանի ժամից ավել այնտեղ չի պահվել՝ ամենաշատը 3-ից 4 ժամ։ Մենք տերմինալի ղեկավարության հետ երկար բանակցել ենք։ Ժամային առումով  երկար մնում են այն բեռնատարերը, որոնք դատարկ են, օրինակ՝ գնում են Ռուսաստան ինչ-որ բան բերելու։ Հատուկ առավելություն է տրվում այն բեռնատարերին, որոնք ունեն փչացող ապրանքներ, բայց սառնարան չունեն, դրանց շատ ավելի արագ են թույլ տալիս»,- ասաց Հայրապետյանը։

Նշենք, որ ցամաքային ճանապարհով՝ Լարսով Հայաստան ժամանողների համար գործում է թեժ գիծ՝ (010) 59-01-04։