Արգենտինահայերի նվիրատվությունները կվերածվեն ներդրումների. դեսպան

Հայաստանում Արգենտինայի դեսպանատունը պատրաստ է աջակցել արգենտինացիներին Հայաստանում ներդրումներ կատարելու համար: Հրավիրված մամուլի ասուլիսում այս մասին նշեց Հայաստանում Արգենտինայի արտակարգ և լիազոր դեսպան Գոնզալո Ուրրիոլաբեիտիան: Հայաստանում ներդրումների հարցում բավական ակտիվ են արգենտինահայերը: Դեսպանը նշեց, որ կան Էդուարդո Էռնեկյանի կողմից իրականացվող նոր նախագծեր:

«Գիտենք, որ ձեռք է բերվել Արտաքին գործերի նախարարության նախկին շենքը, և այնտեղ նախատեսվում է կառուցել բիզնես-կենտրոն: Արգենտինահայերը ներդրումներ են իրականացնում նաև Տավուշում՝ հիմնական շեշտը դնելով ջերմոցային տնտեսությունների վրա: Արդեն գրեթե 120 ջերմոց է կառուցվել: Կարևոր միտում կա, որ արգենտինահայերի նվիրատվությունները կվերածվեն ներդրումների: Սպասվում է, որ շուտով դրանք ավելի ինտենսիվ կլինեն»,-ասաց դեսպանը:

Խոսելով դեսպանատան աշխատանքների մասին՝ Գոնզալո Ուրրիոլաբեիտիան նշեց, որ դրանք մի քանի ուղղություններով են՝ քաղաքականություն, տնտեսություն, մշակույթ, հյուպատոսական գործունեություն:

«Քաղաքական ուղղությունում երկու երկրների հարաբերությունները բարձր մակարդակի վրա են: Առկա է երկխոսություն, երկու երկրները միմյանց աջակցում են միջազգային կազմակերպություններում: Տնտեսական մակարդակում դեսպանատունն աջակցում է արգենտինացի ներդրողներին, կազմակերպվում են կոմերցիոն միջոցառումներ: Առաջիկայում սպասվում է արգենտինական արտադրանքի երկու կոմերցիոն միջոցառում: Ակտիվ աշխատում ենք Հայաստանի կառավարության հետ, հատկապես գյուղատնտեսական ոլորտի հետ կապված, Արգենտինան կենտրոնացած է այդ ուղղության վրա, այստեղ անելիքները շատ են»,-ասաց դեսպանը:

Գոնզալո Ուրրիոլաբեիտիան տեղեկացրեց, որ Հայաստանում կազմակերպվում են նաև արգենտինական ֆիլմերի և արգենտինական տանգոյի փառատոններ: Արդեն աշխատանք է տարվում, որ այս երկու փառատոնների շրջանակը Երևանից դուրս լինի: Նախատեսվում է ընդգրկել Շիրակն ու Տավուշը: 

Խոսելով հայաստանյան ներքաղաքական վերջին զարգացումներից՝ դեսպանը նշեց, որ այն, ինչ Հայաստանում տեղի ունեցավ, հասարակության պահանջի արտահայտումն էր:

«Յուրաքանչյուր փոփոխություն իր հետ սպասելիքներ է բերում: Նոր փոփոխությունների ակնկալիք է զգացվում արգենտինահայերի շրջանում: Բոլոր այն հայերը, ովքեր, ծանր ժամանակաշրջանով պայմանավորված, հասել են Արգենտինա, նրանց զավակներն ու թոռները սերտ կապվածություն ունեն Հայաստանի հետ: Նրանցից շատերը գալիս են Հայաստան, ներդրումներ, բարեգործություն են կատարում, պատրաստ են էլ ավելի աջակցել Հայաստանի զարգացմանը: Հույս ունենք, որ այդ պատրաստակամությունն ակտիվ կլինի»,-հավելեց դեսպանը: