Հայաստանի տնտեսությունում շատ պոզիտիվ փոփոխություններ են տեղի ունենում, Վարչապետ

Հ վարչապետ Նիկոլ Փաշինյանը «Ֆեյսբուք » սոցիալական ցանցի իր էջում ուղիղ եթերի ժամանակ շեշտեց, որ Հայաստանի տնտեսությունում տեղի են ունենում դրական փոփոխություններ: Նա նաև  հույս հայտնեց, որ տնտեսական ակտիվության ցուցանիշների աճը կմեծանա:

Նիկոլ Փաշինյանը նշեց, որ այս տարվա հունիսին գրանցվել է տնտեսական ակտիվության ցուցանիշի 9,6 տոկոս աճ, իսկ հուլիսին՝ 11,1 աճ:

«Հայաստանի տնտեսությունում շատ պոզիտիվ փոփոխություններ են տեղի ունենում, մասնավորապես` հունիսին մենք ունեինք 9.6 տոկոս տնտեսական ակտիվության ցուցանիշ, և հուսով էի, որ հետագայում  ակտիվությունը  ավելի կմեծանա, և, ահա, մենք հուլիսին  արդեն ունենք 11.1 տոկոս  տնտեսական ակտիվության  ցուցանիշ»,- ասաց Փաշինյանը:

Նրա խոսքով` սա հեղափոխությունների պատմության մեջ  բացառիկ երևույթ է:

«Սովորաբար, անկախ իրենց բնույթից, հեղափոխություններից հետո որոշակի տնտեսական անկում է արձանագրվում, որովհետև հսկայական փոփոխություններ են տեղի ունենում,  և նեգատիվ ազդեցություն են ունենում տնտեսության վրա:Ընդ որում, այդ երևույթը մայիսին որոշակիորեն ունեինք, ինչը անհանգստացնում էր նաև մեզ, բայց շատ լավ է և կարևոր է, որ հունիսին և հուլիսին մենք երկնիշին մոտիկ և արդեն երկնիշ տնտեսական ակտիվության ցուցանիշ գրանցեցինք»,- ընդգծեց Փաշինյանը:

Վարչապետը հույս հայտնեց, որ այդ ցուցանիշները կպահպանվեն նաև օգոստոսին, և գնալով դրանց աճի տեմպը ավելի  կմեծանա: