Վերջին 8 տարիների ամենաբարձր տնտեսական աճն է արձանագրվել. Արծվիկ Մինասյան

Տնտեսական զարգացման և ներդրումների նախարար Արծվիկ Մինասյանն այսօր մամուլի ասուլիսին ամփոփեց պաշտոնավարման 100 օրը: Վերջինս լրագրողների հետ զրույցում նշեց՝ 2018-ի առաջին վեց ամսվա կտրվածքով վերջին 8 տարիների ամենաբարձր տնտեսական աճն է արձանագրվել, որը կազմում է 8.3 տոկոս։

«Այս աճին ամենաշատը նպաստող հիմնական բլոկը առևտրի և ծառայությունների ոլորտն է՝ 5.3 տոկոս», - նշեց նախարարը։

Նախարարի խոսքով՝ հունվար-հունիս ամիսներին տնտեսական ակտիվության ցուցանիշը 9.3 տոկոս է եղել։ Ըստ Մինասյանի՝ շինարարությունն աճել է 8.9 տոկոսով, բայց տնտեսական աճի վրա ազդել է 0.5 տոկոս, արդյունաբերությունը նպաստել է 1.4 տոկոսային կետով, գյուղատնտեսությունը՝ 0.5 տոկոսային կետով։

Անդրադառնալով արտահանման ցուցանիշներին՝ նախարարն ասաց, որ արդյունաբերական արտադրանքի շուրջ 50 տոկոսն արտահանվում է. «Արտահանման ցուցանիշը շատ ավելի մեծ կլիներ, եթե հանքարդյունաբերության մասով անկում չլիներ, որը կազմում է 11.8 տոկոս՝ շուրջ 20 միլիարդ դրամ»,-ասաց Մինասյանը։

Խոսելով բարեփոխումների մասին՝ Արծվիկ Մինասյանն ասաց, որ Հայաստան այցելությունների արդյունքում շատերը ներդրման որոշակի թվերի մասին հայտարարություններ են արել. «Եթե վերածենք այդ թվերը, ապա մեկ միլիարդ դոլարն անցնում են, բայց մենք փորձում ենք գնահատել իրատեսականը տեսանելի ժամանակաշրջանում և եկել ենք եզրակացության, որ 240 միլիոնն առնվազն իրատեսական է, և այս կազմակերպությունների հետ աշխատում ենք, որ իրենց գաղափարները վերածեն բիզնես պլանների»,- նշեց նախարարը: