Դուք անում եք հայտարարություններ, որոնք վտանգում են ՀՀ ներդրումային դաշտը

ՀՀԿ պատգամավոր Կարինե Աճեմյանը կառավարության հետ հարցուպատասխանի ժամանակ հարց ուղղեց վարչապետ Նիկոլ Փաշինյանին․

«Ես հասկանում եմ, որ ֆրանսերենի դասերի, հանրահավաքների և կոռուպցիայի դեմ պայքարի արանքում դժվարանում եք տնտեսությամբ զբաղվել, բայց ես Ձեզ պետք է տեղեկացնեմ շատ մտահոգիչ փաստի մասին: Միջազգային վերալուծաբանները հրապարակել են տեղեկություններ՝ 2-րդ եռամսյակում Հայաստանում ներդրումների ստացման ծավալը նվազել է 43 տոկոսով, դրանից հետո ՌԴ-ում հանդիպել եք գործարարների հետ, և այդ երեքուկես ժամանոց հանդիպումից հետո եղան հրապարակումներ և եղան գործարարներ, որ հայտարարեցին՝ իրենք կարող են իրենց ակտիվները հանել ՀՀ-ից և Դուք անում եք հայտարարություններ, որոնք վտանգում են ՀՀ ներդրումային դաշտը: Տնտեսությունը չի կարող շնչել առանց ներդրումների: Արդյո՞ք Ձեր այդ հայտարարություններով չեք վտանգում մեր տնտեսությունը, որովհետև մարդիկ, ովքեր ուզել են Ձեզ վարչապետի աթոռին տեսնել, Ձեզ հետ հույսեր են կապել»,-ասաց Աճեմյանը։

Դրան Ի պատասխան՝ Փաշինյանն ասաց․

«Միջազգային կազմակերպությունները նշում են ներդրումներին խանգարող գործոնների մասին, որոնք են՝ կոռուպցիան, մենաշնորհը և կոռումպացված դատական համակարգը։ Կարող եմ ասել, որ կոռուպցիան այսօր ՀՀ-ում ջախջախված է, մենաշնորհներ չկան և անկախ դատական համակարգի ձևավորումն ընթացքի մեջ է»:

Վարչապետն անդրադառնալով 2-րդ եռամսյակի ցուցանիշներին, նշեց, որ դրանք կապված են ապրիլից հուլիս ընկած ժամանակահատվածում հանրապետությունում կատարված իրողություններով.

«Ապրիլ-մայիսին Ձեր խմբակցության հետ կապ ունեցող մի շարք անձիք իրենց փողերը ՀՀ-ից որոշել էին հանել և արդյունքում ստացվել են այդ ցուցանիշները: Ես հավաստիացնում եմ Ձեզ, որ այդ փողերը կգտնվեն և հետ կվերադարձվեն ՀՀ, ու այս մտահոգությունները կփարատվեն»,-նկատեց Փաշինյանը՝ հավելելով, որ ամեն դեպքում, ի գիտություն են ընդունում պատգամվորի և գործարարների մտահոգությունները: