Սևանա լճի հիմնախնդիրներից է ապօրինի շինությունների առկայությունը

Սևանա լճի մակարդակը բարձրացել է և նախորդ տարվա համեմատ 40 մլն խորանարդով ջուրն ավելացել է:

Այս մասին այսօր ԱԺ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովում «Սեւանա լճի հիմնախնդիրները» թեմայով քննարկման ժամանակ հայտնեց Բնապահպանության նախարար Էրիկ Գրիգորյանը:

Անդրադառնալով Սևանա լճի քանակի, ջրի որակի և կենսաբազմազանության խնդիրներին՝ նա նշեց, որ իրենք հետևողական են դրանց նկատմամբ. «Հետևում ենք հատկապես ջրիմուռների աճին, և վերջին տարիներին ջրիմուռների աճի նման դեպք չէր արձանագրվել: Դրա պատճառը Գեղարքունիքի մարզի կեղտաջրերի լիճը լցվելն էր, եղանակային անբարենպաստ պայմանները, ինչպես նաև անձրևների պակասը»:

Նախարարն ընդգծեց` ձեռնամուխ են լինելու Կողակ տեսակի ձկան արհեստական վերարտադրման աշխատանքներին, ինչպես նաև Սևանի ափամերձ տարածքների մաքրման աշխատանքներին: Նախարարը նշեց, որ 40 մլն խորանարդ ջրառի պահանջն առաջացել է նաև այն ժամանակ, երբ ուսումնասիրել և պարզել են, որ ՀԷԿ-երը նախատեսվածից շատ ջրառ են իրականացրել Սևանա լճից: Միքայել Մելքումյանը Բնապահպանության նախարարից հետաքրքրվեց` իր պաշտոնավարման ընթացքում ի՞նչ է հաջողվել անել, կամ եղե՞լ են խոչընդոտներ, որոնց պատճառով չեն կարողացել ինչ-որ բան անել:

Հարցերին ի պատասխան՝ նախարարն ասաց, որ իրենց գործողությունները սահմանափակող կամ կաշկանդող հանգամանք չկա. «Ունենք մոտ 70 օրենսդրական նախաձեռնություններ, որոնք առաջիկայում կներկայացնենք: Դրանց մի մասը վերաբերում է Սևանա լճին»:

Գրիգորյանը ուշադրություն հրավիրեց մի խնդրի վրա` նշելով, որ օրենսդրորեն բոլոր շինությունները, որոնք գտնվում են նիշից ցածր, ապօրինի են, բացի սովետական ժամանակներում կառուցված շինություններից:

Միքայել Մելքումյանը խնդրեց հստակեցնել նիշից ցածր գտնվող շինությունների հետ կապված թիվը:

Թեև Էրիկ Գրիգորյանը սկզբում չցանկացավ որևէ թիվ նշել` նկատի ունենալով սխալվելու հավանականությունը, բայց ասաց. «Դրանք մոտավորապես 4000-4500-ի սահմաններում են: Քանի որ թիվ էիք ցանկանում իմանալ՝ ես մոտավորապես նշեցի, բայց խոստանում եմ ձեզ հստակ թիվ ներկայացնել»,-ասաց Գրիգորյանը: