Քաղաքական փոփոխություններից հետո թվում էր՝ պետք է դեպի Հայաստան ներդրումների հոսքերն ավելանային։ Այդպիսի կարծիք էին ձևավորում նոր իշխանության եկած տնտեսական բլոկի պատասխանատուները, ավելին՝ Փաշինյանն ինքն էր անձամբ հայտարարում, թե Հայաստանն արդեն նպաստավոր պայմաններ ունի ներդրումների համար և արդեն իսկ կոտրվում է մենաշնորհային դիրքը և դաշտը բացվում յուրաքանչյուրի առաջ։ Վարչապետը նման մի ամպագոռգոռ հայտարարություն արեց վերջին քարոզարժավի ժամանակ, թե ուր որ է՝ շաքարի գործարան կբացվի Հայաստանում։ Սակայն հատկանշական է այն, որ թեև որպես Սևանի շաքարի գործարանի սեփականատեր պետռեգիստրում նշված է Արմեն Առաքելյանի անունը, սակայն թե՛ հանրահավաքի, թե՛ Սանկտ Պետերբուրգում տեղի ունեցած հանդիպման ժամանակ վարչապետը որպես սեփականատեր և պոտենցիալ ներդրող է ներկայացնում ՌԴ-ի հայ գործարար Գարիկ Բակլաչյանին։
ԼՈւՐԵՐ.com-ը հետաքրքրվեց՝ ինչ-որ էական քայլե՞ր են արվել հայտարարությունից հետո, թե՞ սա ևս «գրվեց սառույցին», ինչպես բազմաթիվ այլ հայտարարություններ։ Ե՞րբ ի վերջո կվերագործարկվի գործարանը, քանի՞ աշխատատեղ կստեղծվի, որքա՞ն ներդրում անհրաժեշտ կլինի վերագործարկման համար: Այս և այլ հարցերի պատասխանները փորձեցինք ստանալ Տնտեսական զարգացման և ներդրումների նախարարությունից։
Այնտեղից վստահեցրին, թե գործարանն աշխատելու դեպքում էականապես կնվազի Հայաստանի կախվածությունը այլ երկրներում շաքարի գների տատանումներից, նաև որոշակիորեն կմեղմացվեն Կոտայքի և Գեղարքունիքի մարզերի սոցիալական խնդիրները, քանի որ ընկերության վերագործարկմամբ նախատեսվում է վերաբացել 80-100 աշխատատեղ, միջինը՝ ավելի քան 120.000 դրամ ամսական աշխատավարձով:
«Գործարանի արտադրողականությունը նախատեսվում է հասցնել օրական 60 տոննայի, որի հետևանքով ամսական շրջանառությունը կկազմի ավելի քան 1 մլն ԱՄՆ դոլար: Ֆրանսիական SUCDEN ընկերության հետ ձեռք է բերվել պայմանավորվածություն հումքի մատակարարումների վերականգնման մասով:
Նախատեսվում է, որ հումքի գինը ֆիքսվելու է Նյու-Յորքի բորսայական գներին համապատասխան: Ներկրումը կատարվելու է ծովային ճանապարհով՝ մինչև Փոթի, իսկ այնտեղից Հայաստան՝ ավտոմոբիլային կամ երկաթուղային տրանսպորտով: Շաքարի հումքը Հայաստանի Հանրապետությունում ազատված է մաքսատուրքերից: Առկա է միայն սահմանի վրա ավելացված արժեքի հարկի (ԱԱՀ) վճարման խնդիրը»,-փոխանցում են նախարարությունից՝ նշելով,
որ ղեկավարությունն ականկալում է, որ մոտ ապագայում Կառավարությունը կընդունի համապատասխան որոշում` ԱԱՀ-ի վճարման գործընթացը սահմանից արտադրություն տեղափոխելու մասով:
Նախարարության փոխանցմամբ, ըստ նախնական հաշվարկների, ընկերության վերագործարկման կազմակերպչական ծախսերի համար անհրաժեշտ է կատարել շուրջ 34 մլն դրամի ներդրում: Նշված ծախսերից բացի, նախատեսվում է ներկրել նախնական 4000 տոննա հումք, ինչի համար ծախսվելու է 1.2 մլն դոլար։ Ըստ ներդրումային ծրագրի, ընկերության հասույթը 2019 թվականին կկազմի շուրջ 12,5 մլն դոլար, իսկ տարեկան շահույթը պլանավորվում է հասցնել 2 մլն դոլարի:
Ընկերության ղեկավարությունն ու իշխանությունն այն համոզմանն են, որ վերագործարկման արդյունքում կշահի ոչ միայն ընկերությունը, այլև ողջ տարածաշրջանը, հանրապետությունը:
«Արդեն իսկ սկսվել է և շուտով Սևանում կվերաբացվի շաքարի գործարանը, որի սեփականատերը այստեղ ներկա է
»,- ամսվա սկզբին վարչապետի պաշտոնակատար Նիկոլ Փաշինյանի կողմից արված այս ամպագոռգոռ հայտարարությանը հակառակ՝ գործարանի սեփականատերը հրաժարվում է որևէ մեկնաբանություն տալուց։ Ստացվում է՝ Փաշինյանի հայտարարությունները մնում են միայն խոսքեր, քանի որ հեղափոխությունից հետո մինչ օրս իրական որևէ ներդրում չի արվել։
Ի դեպ, այս գործարանի հետ է կապվում ԱԺ պատգամավոր, գործարար Սամվել Ալեքսանյանի անունը, ով այս ոլորտում մենաշնորհային դիրք է զբաղեցնում։ Իսկ թե ինչ կապ ունի վերջինս գործարանի հետ հարցն անտեսեցին նախարարությունից, իսկ երբ հարցի պատասխանը փորձեցինք ստանալ գործարանի սեփականատեր Արմեն Առաքելյանից, վերջինիս օգնականըԼՈւՐԵՐ․com-ի թղթակցի հետ զրույցում փոխանցեց, որ գործարանի սեփականատերը հարցերին կպատասխանի գործարանի բացվելուց հետո միայն։ Թե երբ կվերաբացվի այն՝ դեռևս անհայտ է։
Նկատենք, որ դեռևս ամիսներ առաջ, երբ այդ ժամանակվա Տնտեսական զարգացման և ներդրումների նախարար Արծվիկ Մինասյանն այցելել էր գործարան, նույն հարցին ի պատասխան ասել էր, թե Էկոնոմիկայի նախարարությունը սեփականատերերի հարցով չի զբաղվում․ «Մեզ համար կարևոր չէ, թե ովքեր են սեփականատերերը: Մեզ համար կարևոր է, թե կազմակերպությունն ունի՞ հնարավորություն և ի՞նչ աջակցություն է պետք, որպեսզի իրենք կարողանան դառնալ մեր արտադրողներից: Ըստ մեզ մոտ եղած փակ բաժնետիրական ընկերության կանոնադրության հոդվածների՝ Սամվել Ալեքսանյան անուն չկա»,- ասել էր Մինասյանը:
Նշենք, որ այս տարվա հուլիսին Սանկտ Պետերբուրգում վարչապետ Նիկոլ Փաշինյանի և ռուսաստանաբնակ հայազգի գործարարների հանդիպման ժամանակ անդրադարձ էր եղել Սևանի շաքարի գործարանին: Գործարարներից մեկը հայտարարել էր, որ մոտ 15 տարի առաջ ներդրում է կատարել Սևանի շաքարի գործարանում, 4 տարի աշխատելուց հետո եկել է Սամվել Ալեքսանյանը, «վերցրել է մի փայը», ու գործարանն արդեն 9 տարի կանգնած է:
ՈՒՂԻՂ ԵԹԵՐ
Ամենադիտված 
Ցմահ դատապարտյալ Արթուր Քոչարյանն ազատ է արձակվել
