Վորոնեժում 3 և 2-ամյա հայ երեխաները մահացել են գազի թունավորումից

Ռուսաստանի Վորոնեժի շրջանում 3 տարեկան տղան և նրա 2-ամյա քույրը մահացել են գազի թունավորումից։ Այս մասին ԼՈւՐԵՐ․com-ը տեղեկանում է «РИА Новости»-ից՝ վկայակոչելով տեղի դատախազությանը:

Աղբյուրը հայտնում է, որ երեխաների մարմինները հայտնաբերվել են նոյեմբերի 16-ին, Սամիլուսկի շրջանի Ստարայա Վեդուգա գյուղի «Պոդվորյե» ԲԲԸ ֆերմայի բնակելի հատվածում։

«Նախնական եզրակացության համաձայն, երեխաների մահվան պատճառը ածխաթթու գազի թունավորումն է։ Ծնողները երեխաներին մենակ են թողել մետաղյա վառարանով ջեռուցվող բնակելի տարածքում», - ասվում է հաղորդագրության մեջ։

 Դատախազության փոխանցմամբ՝ երեխաների ծնողները, որոնք Հայաստանի քաղաքացիներ են, Ռուսաստան են տեղափոխվել 2018 թվականի ապրիլին և կանգնել միգրացիոն հաշվառման։

Պարզվում են դեպքի հանգամանքները։ 

«Դատախազությունը ստուգումներ է իրականացնում անչափահասների անտեսման վերաբերյալ։ Ուսումնասիրվելու են հանգամանքները, թե ինչպես է ընտանիքը ապրում ֆերմայում գտնվող տարածքում, ինչպես նաև իրավական գնահատական ​​է տրվել միգրացիոն գրանցման և խնամակալության հարցերով զբաղվող մարմինների պաշտոնատար անձանց գործողություններին կամ անգործությանը», - հայտնում է վերահսկիչ մարմինը: