Հարկատեսակը պետք է փոխվի, թե չէ՝ ռեստորաններում գները կբարձրանան․ ահազանգ

Օրերս Հայաստանի ռեստորանների միությունը հայտարարություն է տարածել, որով տեղեկացնում էր, որ իրենք պատրաստ են մեկ օրով փակել իրենց դռները՝ ի նշան բողոքի։ Նրանք դժգոհում են նոր հարկատեսակներից, որոնք դժվարությունների առաջ են կանգնեցրել նրանց՝ ազդելով գների բարձրացման վրա։ 

Ստեղծված իրավիճակի մասին առավել մանրամասն ԼՈՒՐԵՐ.com-ի թղթակիցը զրուցեց Հայկական ռեստորանների միության կոորդինատոր Աշոտ Բարսեղյանի հետ, որը նշեց, որ հարկային դաշտի փոփոխությունը և հարկման տեսակի փոփոխությունը կարող է խիստ բացասական անդրադառնալ շուկայի գների վրա, ներքին սպառմանը և արդեն գարնանից կարող է խիստ նվազեցնել տուրիստական երկրի գրավչությունը, որի օրինակը տեսել են այս տարվա հուլիսին․ «Այն թեթև բարձրացումը, որը մենք ունեցանք հուլիսից մինչև այսօր, մեզ ցույց տվեց, որ տուրիստական ընկերությունները բազում չեղարկումներ ունեցան»։

Բարսեղյանը նկատեց, որ բիզնեսը սկսվել է հարկվել հուլիսի1-ից՝ շրջանառության հարկով․ «Դա սանդղակային է, աճում է և հունվարի 1-ին  հերթական աճն է, հաջորդ հունվարի 1-ին ևս մեկ անգամ աճ է նախատեսվում։ Սա, մեր կարծիքով, խիստ բացասական է անդրադառնում շուկայի վրա՝ գների բարձրացում, սպառումն է նվազում։ Մեր կարծիքով պետությունը ինչ նպատակ ուներ՝ արդեն այդ նպատակներն իրականցրել է։ Հետագա ճնշումը  բիզնեսի վրա՝ հարկային բեռի ավելացման առումով, արդեն ավելորդ է»։

Միության կոորդինատորը մեր հարցին, թե որևէ պատասխան չի եղե՞լ կառավարությունից կամ Ֆինանսների նախարարությունից՝ նշեց, որ դեռևս չի եղել․ «Ֆինանսների նախարարությունը թյուր կարծիք ունի ոլորտում ձևավորվող եկամտի մասին և իրենց կարծիքով գերշահույթ է ձևավորվում, այնինչ մեր շահույթի նորման երեք անգամ նորմատիվից ցածր է։ Եվ հետագա գների բարձրացումը կանխել հնարավոր չէ։ Մենք Տնտեսական զրագացման և ներդրումների նախարարության միջոցով հարցի շուրջ մեր տեսլականն ենք ուղղել, որով 5 տարով պետք է սառեցվի այս վիճակը, որ այսօր արդեն կա՝ հետագա փոփոխություններն ավելի փափուկ և անվնաս տանելու համար»։

Չնայած դեռևս արձագանք չկա միության բողոքին, այնուամենայնիվ Բարսեղյանը կարծում է, որ մինչև հունվար համագործակցությունը կստացվի․ «Հակառակ դեպքում կկիրառենք մեր նշված բողոքի տեսակը․ ավելի լավ է մի թեթև ռադիկալ քայլերի դիմել, ուշադրություն գրավել և հարցերը լուծելու ճանապարհով գնալ»,- ասաց նա։

Վերջինս ամփոփելով նշեց, որ իրենց նպատակն է, որ պետությունն ուղիղ կապ հաստատի բիզնեսի հետ և կիսի բիզնեսի անհանգստություններն ու մտահոգությունները։ «Մեկ տարի է մենք անտեսված ենք․ ինչ անում ենք՝ պատասխան չենք ստանում, հետադարձ կապ չկա պետության կողմից»։

Արմինե Արմենակյան