Կարապետյանին հաջողվեց, իսկ Փաշինյանի՞ն

Մամուլում տարածված լուրերը, թե Հայաստանի կառավարությունը ՌԴ փոխվարչապետ Դմիտրի Կոզակից նամակ է ստացել, որի համաձայն հունվարի 1-ից Հայաստանին մատակարարվող գազի սակագինը 150 դոլարից դառնալու է 215 դոլար, մեծ աղմուկ է բարձրացրել։ 

ԼՈւՐԵՐ․com-ի հետ զրույցում տնտեսագետ Սուրեն Պարսյանը նշեց, որ գազի գինը պայմանավորված է քաղաքական գործոնով և ներկա իշխանությունների բանակցային գործընթացներով․ «Նախորդ իշխանության օրոք, 2017թ․ տարեսկզբին գազի գնի սակագնի վերանայումը պայմանավորված էր քաղաքական գործոնով՝ մասնավորապես, նախկին վարչապետ Կարեն Կարապետյանի գործոնով, որը կարողացավ բանակցել ռուսական կողմի հետ, հետևաբար, նրանք իջեցրին բնական գազի սակագինը։ Թեև այն սահմանին չփոխվեց, բայց Հայաստանի շուկայում նվազեց․ ի հաշիվ շահույթի՝ «Գազպրոմ Արմենիա»-ն նվազեցրեց գինը։ Այժմ բնական գազի սակագնի հաշվարկումը կախված է նրանից, թե ներկայիս ղեկավարությունը ինչպես կտանի բանակցությունը»,-նշեց նա։

Նշենք, որ դեկտեմբերի 31-ին ավարտվում է ռուսական գազի մատակարարման պայմանագրի գործողության ժամկետը: Պարսյանը հիշեցրեց, որ նման իրավիճակում Հայաստանը հայտնվել է  նաև 2011թ․, բայց եթե նախորդ անգամ կուտակված պարտքի համար Հայաստանը տրամադրեց «ՀայՌուսգազարդ» ՓԲԸ բաժնետոմսերի 20 %-ը, ապա այս անգամ տրամադրելու ոչինչ չկա․ «Երբ 2010թ․ դեկտեմբերի 31-ին ավարտվեց ՀՀ հետ գազի պայմանագրի ժամկետը, նոր պայմանագիր չկնքվեց, և այդ ժամանակվա իշխանությունները թաքցրին, որ ռուսական կողմը մատակարարումն իրականացնում է ավելի բարձր գնով։ Թեև մատակարարումը սահմանին բարձր գնով էր իրականացվում, սակայն բնակչության համար չէր փոխվել, ինչի հետևանքով կուտակվեց 300 միլիոնի դոլարի պարտք։ Նույն իրավիճակում ենք նաև այսօր․ ռուսական կողմի հայեցողությամբ, կարող է նոր գին սահմանվել և գազը մատակարարվել, օրինակ, 215 դոլարով։ Եթե բնակչության համար սակագինը չփոխվի, այդ դեպքում էլ պարտք կկուտակվի»,- ասաց նա՝ ընդգծելով, որ նման իրավիճակից խուսափելու համար այս ամիս մենք պետք է հստակ իմանանք, թե որքան է կազմելու գազի գինը սահմանին։

Ըստ նրա՝ այս իրավիճակում հայկական կողմը պետք է Իրանից գազի ներմուծման հնարավորությունները, թե ինչ գնով է իրանական կողմը պատրաստ մատակարարել գազը․ «Մինչև հիմա իրանական կողմի առաջարկած գազի գինը ավելի թանկ է եղել, բայց եթե ռուսականը թանկանա՝ իրանական գազը կարելի է օգտագործել որպես այլընտրանք։ Ցավոք սրտի, այս մասին խոսակցություններ չկան»,- նշեց տնտեսագետը։

Հիշեցնենք, որ անդրադառնալով հնչեղություն առաջացրած խնդրին՝ ՀՀ փոխվարչապետի պաշտոնակատար Տիգրան Ավինյանի մամուլի խոսնակ Վահան Հունանյանը հերքել է լուրերը․ «Այս պահին գազի գնի առնչությամբ որոշում չկա և չկա որևէ ամրագրված սակագին: ՀՀ կառավարությունը ՌԴ փոխվարչապետ Դմիտրի Կոզակի կողմից նամակ չի ստացել, նման նամակ գոյություն չունի»:

Սոնա Հարությունյան