Պուտինի և Լուկաշենկոյի բանակցությունները տևել են 4 ժամ

Ռուսաստանի և Բելառուսի նախագահներ Վլադիմիր Պուտինն ու Ալեքսանդր Լուկաշենկոն բանակցություններն ավարտել են: Զրույցը, որը տեղի է ունեցել  Կրեմլում ոչ մեծ ընդմիջումներով և ձևաչափի փոփոխությամբ, տևել է գրեթե 4 ժամ: Այդ մասին հաղորդում է ՏԱՍՍ-ը:

Բանակցությունները սկսվել են ընդլայնված կազմով՝ երկու երկրների պատվիրակությունների մասնակցությամբ:  

Պուտինը հանդիպման սկզբում առաջարկել է բազմաստիճան ձևաչափ: «Ես առաջարկում եմ նման կարգավորում. մենք կլսենք, թե ինչպես են մեր գործընկերներն աշխատել, այնուհետև հնարավորություն կտանք պատվիրակություններին շփվել, իսկ Ձեզ այնուհետև ցանկանում եմ առանձին հրավիրել նախաամանորյա աշխատանքային ճաշի»,- դիմելով Լուկաշենկոյին՝ ասել է Պուտինը: Ողջույնի խոսքից հետո առաջնորդների զրույցը շարունակվել է փակ դռների հետևում:

Պատվիրակությունների մասնակցությամբ բանակցությունների ավարտից հետո Պուտինը փոքր ընդմիջում է վերցրել, որպեսզի զանգահարի ծանր հիվանդությամբ տառապող 15-ամյա Արսլան Կաիպկուլովին, ում ցանկությունը ՌԴ առաջնորդը խոստացել էր իրականացնել: Դրանից հետո ՌԴ նախագահը շարունակել է Լուկաշենկոյի հետ զրույցն աշխատանքային ճաշի ձևաչափով:

Բանակցությունների առավել սուր հարցերից, ըստ փորձագետների, եղել է Մոսկվայի հարկային մանևրից Մինսկի եկամտի պակասի համար փոխհատուցման թեման: Ռուսական կողմին էլ անհանգստացնում է Բելառուսի կողմից Միութենական պետության մաքսային ռեժիմի խախտումների թեման: