2018թ.-ը միակ տարին է, որտեղ զուտ եկամուտներն են հաշվառված․ ՊԵԿ նախագահ

Պետական եկամուտների կոմիտեի նախագահ Դավիթ Անանյանն այսօր հրավիրված մամուլի ասուլիսի ժամանակ ներկայացրեց  ՀՀ 2018թ. պետական բյուջեի հարկային եկամուտների կատարման հաշվետվությունը։

Ըստ ՊԵԿ  նախագահի՝ 2018 թվականին հարկ վճարողներից ՊԵԿ-ը գանձել է 1,068 մլրդ (տրիլիոն վաթսունութ միլիարդ դրամ), ինչը 2017 թ. համեմատ 22,1%-ով ավել է։

«2018թ.-ը միակ տարին է, որտեղ զուտ եկամուտներն են հաշվառված։ Մենք արձանագրել ենք հարկային եկամուտների բարենպաստ ցուցանիշ։ Մենք տարեսկզբին ունեցել ենք 132,7 միլիարդ պարտք, որը տարեվերջին հասցրել ենք 21,5 միլիարդի»,- նշեց Անանյանը։ Իսկ թե կոռուպցիոն բացահայտումների արդյունքում որքան գումար է մուտք գործել պետբյուջե, Դավիթ Անանյանը նշեց, որ առանձին ստուգումներ չեն արել, քանի որ բոլոր հաշվարկները միասին են արվել․ «Միանշանակ չեմ կարող ասել, թե որտեղից որքան գումար է մուտք գործել»։

ՊԵԿ նախագահը, անդրադառնալով մեքենաների մաքսազերծման շուրջ «թյուրիմացությանը», մանրամասնեց ինվոյսով գործընթացի կարևորությունն ու 2019թ. շրջանառության մեջ դրված մաքսազերծման նոր համակարգին․ «Նոր համակարգի նպատակը անարժանահավատ գործունեության վերահսկումն ու վերացումն է, իսկ ինվոյսի  գործառույթը նույնն է. եթե ներկրվող մեքենայի գինը սահմանված չափից ավելի ցածր է, հատուկ զննում է անցնում, և եթե  ամեն ինչ նորմալ է լինում՝ գործարքն ինվոյսով է կատարվում»։