25 կգ-ը քիչ քանակ չէ. ՊԵԿ պաշտոնյա

Ինչպես արդեն տեղեկաքցրել ենք՝ Բագրատաշենի անցակետում բողոքող քաղաքացիները փակել են միջպետական ճանապարհը։ Պատճառը 2019թ. հունվարի 1-ից ուժի մեջ մտած նոր օրենքն է, ըստ որի՝ ԵԱՏՄ անդամ երկրների քաղաքացիները երրորդ երկրներից կկարողանան առանց մաքսային վճարների առավելագույնը մինչև 500 եվրոյին համարժեք գումարի և 25 կգ ընդհանուր քաշով ապրանքներ ներմուծել։

ԼՈւՐԵՐ․com-ի հետ զրույցում ՊԵԿ-ի մաքսային հսկողության վարչության պետի տեղակալ Մհեր Մարտիրոսյանը նշեց, որ նախևառաջ պետք է պարզաբանել արտոնությունների տրամադրման նպատակը․ «Մարդկանց թվում է, որ ցանկացած պարագայում իրենք արտոնյալ քանակով ապրանքներ ներկրելու իրավունք ունեն, սակայն պետք է հստակեցնել, որ խոսքը օրենսդրությամբ սահմանված արժեքային և քանակական որոշակի չափը նախատեսված է միայն անձնական օգտագործման նպատակով ապրանքների ներմուծմանը՝ անձամբ կամ ընտանիքի անդամներով սպառելու համար։ Ոչ մի դեպքում այս արտոնությունը նախատեսված չէ առևտրային շրջանառության մեջ ապրանքներ մտցնելու համար, որովհետև այդպես մենք ապականում ենք շուկան, վնասում ենք մարդկանց, որոնք օրինական ճանապարհով հարկերը մուծելով՝ ներմուծում են ապրանքներ»,- հստակեցրեց Մարտիրոսյանը։

Նա բացատրեց, որ փոփոխությունները եղել են անձնական օգտագործման ապրանքների ներմուծման քանակի մեջ. եթե նախկինում ցամաքային տրանսպորտով ներմուծման համար արտոնված էր 50 կգ, հունվարի 1-ից նվազեցվել է՝ հասցնելով 25 կգ-ի, արժեքային չափը ևս նվազել է՝ դառնալով 500 եվրո։ 

«Բողոքի էությունը հավանաբար այն է, որ մարդիկ ցանկանում են ներմուծել ապրանքներ հետագայում իրացնելու նպատակով և հանդիպում են մաքսային մարմինների հակազդեցությանը։ Կոչ կանեի մեր քաղաքացիներին՝ տարբերակել բիզնես նպատակները անձնական նպատակներից։ Հավատացեք, որ անձնական նպատակներով օգտագործման համար 25 կգ օգտագործման իրերի համար քիչ քանակ չէ»,-ասաց նա։ 

Հարցին՝ արդյոք քաղաքացին իրավունք ունի 2-3 օրը մեկ սահման հատել ու 25 կգ ապրանք բերել, մաքսային հսկողության վարչության պետի տեղակալը պատասխանեց․ «Իրավունքի հիմնարար ցուցիչն անձնական օգտագործումն է․ եթե անձը ապրանքը ներկրելուց հետո վաճառում է շուկայում, ապա դա որևէ կերպ չի տեղավորվում օրենքի շրջանակում, դա կորակվի որպես չգրանցված ձեռնարկատիրական գործունեություն։ Հետևաբար, պետք է պարզել՝ ինչ նպատակով է ապրանքը ներմուծվում։ Եթե, օրինակ, սահմանամերձ բնակավայրի բնակիչն ամեն օր սահմանն անցնի հաց առնելու համար, դրա համար խստություն չի արվի, բայց եթե անձը այնպիսի հաճախականությամբ է սահմանը հատում, որ 4 օրվա ընթացքում անձնագիր փոխելու անհրաժեշտություն է ունենում, չենք կարծում, թե դա անձնական օգտագործման նպատակով է արվում»,- ընդգծեց Մհեր Մարտիրոսյանը։