Դա երկու ամսվա աշխատավարձի, հավելավճարների և պարգևատրումների չափն է. ՊԵԿ նախագահի պարզաբանումը

Քիչ առաջ համացանցում տեղեկություն էր տարածվել, որտեղ ներկայացնում էին դեկտեմբերին ՊԵԿ աշխատակիցների ստացած աշխատավարձային և պարգևատրումային ֆոնդը։ Տեղեկություններն իրականությանը համապատասխանում են, թե ոչ ԼՈւՐԵՐ.com-ը պարզեց Պետական եկամուտների կոմիտեի նախագահ Դավիթ Անանյանից: Վերջինս, անդրադառնալով հրապարակմանը, վստահեցրեց՝ այդպիսի պարգևատրումներ իրենց մոտ չկան։

Ըստ նրա՝ դա երկու ամսվա աշխատավարձի, հավելավճարների և պարգևատրումների չափն է. «Դեկտեմբերին վճարվել են նոյեմբեր և դեկտեմբեր ամիսների աշխատավարձերը, հավելավճարները և պարգևատրումները, որոնց հանրագումարը կարող է այդքան կազմել»,- մեզ հետ զրույցում նշեց ՊԵԿ նախագահը:

Նշենք, որ ըստ Yerevan.today կայքի հրապարակման՝ ՊԵԿ-ի մի շարք պաշտոնյաներ դեկտեմբերին մեկից ավելի միլիոն դրամ աշխատավարձ և պարգևատրումներ են ստացել, մասնավորապես՝ ՊԵԿ նախագահ Դավիթ Անանյանը՝ 8 մլն 55 հազար դրամ (ամսական աշխատավարձը կազմում է 793 680 դրամ), իսկ ՊԵԿ նախագահի տեղակալ Ռաֆիկ Մաշադյանը՝ 9 մլն 60 հազար դրամ:

Սոնա Հարությունյան