«Ազգովի պետք է սուբսիդավորե՞նք հանցագործին». փոխնախարարի կոշտ դիտարկումը զայրույթ առաջացրեց

«Եթե փաստաբանական ծառայություններն ազատենք ավելացված արժեքի հարկից կամ նրանց համար սահմանենք ցածր հարկային բեռ, բոլորն են չէ՞ օգտվելու այդ հարկային բեռից, բոլոր շահառուները, այդ թվում, կներեք բառիս համար, հանցագործները, որոնք ևս դիմում են փաստաբանական ծառայությունների։ Հիմա հարց է ծագում՝ մենք ազգովի պետք է սուբսիդավորե՞նք այդ հանցագործին»,– այս մասին այսօր ասաց Ֆինանսների նախարարի տեղակալ Արման Պողոսյանը՝ արձագանքելով փաստաբանական ծառայությունները ԱԱՀ–ից ազատելու առաջարկին։ 

Փոխնախարարի դիտարկումն իրարանցում առաջացրեց, ներկաներն իրենց զայրույթ արտահայտեցին: Քննարկման մասնակիցներից մեկն էլ անեկդոտ պատմեց. «Դա նման է նրան, որ մի գյուղ 2 անբարոյական է լինում, ասում են՝ եկեք անբարոյականությունը չխրախուսելու համար բոլոր տղամարդկանց անդամահատենք: Չի լինի՞, այդ երկուսին գյուղից դուրս հանել»:

Սակայն փոխնախարարը համեմատությունը տեղին չհամարեց: Այնուհետև փորձեց իր խոսքն օրինակներով հիմնավորել. «Այսօր առողջապահական ծառայություններն ազատված են ԱԱՀ–ից, բոլոր տեսակի առողջապահական ծառայությունները՝ սկսած պլաստիկ վիրահատությունից, վերջացրած՝ առաջին անհրաժեշտության առողջապահական ծառայությունները: Ինչ է կատարվում՝ մենք ազգովի սուբսիդավորում ենք մեկին, որ գնա իր բարեմասնությունները կամ քիթը կարգի բերի: Նորմա՞լ է դա, որ չենք կարողանում սրտի ստենտավորումը 100 տոկոսով պետպատվերով ապահովենք, բայց սուբսիդավորում ենք մարդկանց, որոնք դրա կարիքն ընդհանրապես չունեն»,- պարզաբանեց նա։

Փոխնախարարի խոսքին միջամտելով՝ Փաստաբանների պալատի նախագահ Արա Զոհրաբյանն իր հերթին հանցագործ բառի վերաբերյալ դիտարկում արեց. «Երբ պաշտոնատար անձը մեղադրվող անձին հանցագործ է անվանում դա շատ լուրջ վերաբերմունք ու պիտակավորում է, քանի որ մեղադրվող անձը դեռ հանցագործ չէ»,- նշեց նա։ 

Նշենք, որ Ֆինանսների նախարարությունը հանրային քննարկման է ներկայացրել «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին» ՀՀ օրենքի նախագծի և հարակից օրենքների նախագծերի փաթեթը, որով նախատեսվում է իրավաբանների, փաստաբանների, խորհրդատվական ընկերությունների համար շրջանառության հարկ վճարող համարվելու հնարավորությունը սահմանափակել:

Սոնա Հարությունյան