Կալուգայի աղետն ու 30 տարեկան ավտոբուսը, որի վարորդը բազմիցս տուգանվել է

Կալուգայում տեղի ունեցած ՃՏՊ-ի հետևանքով զոհվել է 7 մարդ, այդ թվում՝ երեք երեխա: 13 տուժածները շարունակում են մնալ հիվանդանոցներում: Ռուսական Առաջին ալիքը, անդրադառնալով երեկ գիշեր տեղի ունեցած դժբախտ պատահարին, պատմում է դեպքին հաջորդած իրադարձությունների մասին:

Կալուգայի բնակիչները, ցնցված խոշոր ավտովթարի հետևանքով, այցելում են եկեղեցի և աղոթում զոհվածների հոգիների հանգստության համար: Իսկ հիվանդանոցում շարունակում են բուժում ստանալ 13 տուժածները, որոնք խորը վնասվածքներ են ստացել կոտրված ապակիների բեկորներից։

Ավտոբուսի խցիկում է գտնվել 31 երեխա, նրանք Սմոլենսկի շրջանի Յարցևո փոքր քաղաքի «Колибри» պարային խմբի անդամներն էին, որոնք մեկնում էին Կալուգա՝ մրցույթի մասնակցելու: Վարկածներից մեկի համաձայն՝ վարորդը մերկասառույցի պատճառով չի կարողացել կառավարել ավտոբուսը: Այն կողաշրջվել է, ուղևորները չեն կարողացել դուրս գալ թեքված տրանսպորտային միջոցից: Տուժածների մեջ կան նաև ծնողներ, որոնք ուղեկցում էին երեխաներին:

ՌԴ առողջապահության փոխնախարար Սերգեյ Կրաևոյն ասել է. «Զոհվել են այն ուղևորները, որոնք գտնվել են ավտոբուսի վերջին նստարանին: Այնտեղ մեքենայի շարժիչն է, հենց դա էլ հանգեցրել է աղետալի հետևանքների»:

Յարցևոյի բնակիչները ծաղիկներ ու փափուկ խաղալիքներ են տանում մշակույթի տուն, որտեղ գործում էր «Колибри» պարային խումբը: Երեխաները հաճախ են մասնակցել արտագնա մրցույթների: Այսպիսի ուղևորությունների համար ղեկավարությունը ավտոբուսներ է վարձակալել մասնավոր ընկերություններից:

Քրեական գործ է հարուցվել երկու հոդվածներով, այդ թվում՝ անվտանգության կանոնների չպահպանման պայմաններում ծառայությունների մատուցման մասին: Արդեն ձերբակալված է վարորդը, որն անցյալ տարի տուգանվել էր հենց երեխաների տեղափոխումը խախտումներով կատարելու պատճառով, նաև սեփականատերը՝ 61-ամյա ձեռնարկատեր Սերգեյ Գորդեևը:

Հետաքննությունը կպարզի՝ արդյոք նա ունեցել է լիցենզիա: Օրենքի համաձայն՝ երեխաների խումբ տեղափոխելու իրավունք ունեն այն մեքենաները, որոնք շահագործվել են ոչ ավելի, քան 10 տարի: Իսկ այս ավտոբուսն արտադրված է եղել 30 տարի առաջ և այս ընթացքում կտրել-անցել է ավելի քան 800 կմ: Հայտնի չէ՝ տեխզննում անցե՞լ է, թե՞ ոչ:

Յարցևո քաղաքի ավտոպարկի մյուս երեք ավտոբուսներն ավելի հին են, բայց ընկերությունը պարբերաբար իրականացրել է ուղևորափոխադրումներ. ընդ որում՝ երկու տարի առաջ ստուգման ժամանակ պարզվել է, որ այստեղ վարորդներն աշխատանքը ստանձնելիս բուժզննում չեն անցել: Ընկերությունը ստացել է խախտումները վերացնելու հրահանգ: Աղետից հետո պարզ կդառնա նաև, թե ինչու է երեխաներով ավտոբուսը հայտնվել ավտոճանապարհին առանց՝ այսպիսի դեպքերում պարտադիր համարվող Ճանապարհային անվտանգության տեսչության թույլտվության:

Shantnews.am